Gianunsyo sa Memphis Grizzlies niadtong Domingo, Hunyo 8, 2025, nga si Zach Edey, ilang 7-foot-3 nga sentro ug napili sa NBA All-Rookie Team, kinahanglan na usab operahan human ma sprain niini ang iyang left ankle.
Matod sa team, nag-ehersisyo si Edey karong semanaha dihang napiang pagbalik ang iyang ankle. Base sa resulta sa imaging, nakita nga adunay labaw nga kaluag sa mga ligaments, ug kini ang atimanon pinaagi sa operasyon aron makarekober.
Si Edey, nga duha ka beses nga gideklarar nga National Player of the Year sa Purdue, nakamiss og 12 ka duwa sa sinugdanan sa season tungod sa maong injury. Bisan pa niini, nakaduwa gihapon siya og 66 ka games, diin 55 niini usa siya ka starter ug nag-average og 9.2 ka puntos ug 8.3 ka rebounds kada duwa — pinakataas nga rebounding average sa tanang rookies.
Gipahibalo usab sa Grizzlies nga hatagan og preliminary timeline ang recovery human sa operasyon, ug gilauman nga makarekober og hingpit si Edey. / RSC