ATOL niining pagsuwat nagpadayon ang manhunt sa Toledo City Police Station batok sa duha ka mga armadong lalaki nga nakigpinusilay sa mga polis sa alas 2:30 sa kaadlawon, Miyerkules, Marso 5, 2025, nga nihimo unta og imbestigasyon sa nahitabong shooting incident sa Sitio Highway, Barangay DAS, Toledo City niadtong Martes sa alas 3:30 sa hapon, Marso 4, 2025.
Matod ni Police Lieutenant Colonel Wilfredo Alarcon Jr., hepe sa Toledo City Police Station nga ang ilang gipangita sa pagkakaron nga nakasibat mao silang Brendo Villarmia, hingkod, taga Purok 8, Barangay Bunga, Toledo City ug usa ka alyas Minggoy.
Atol sa pinusilay alas 2:30 sa kaadlawon naigo ang ilang kauban nga si Jamil Padua, alyas Janjan ug namatay sa tambalanan.
Gitug-an ni Alarcon nga duna silay nadakpan nga kauban sa tulo nga nakuhaan nila og armas nga giila nga si Jerome Padua.
Unang gipusil sa maong mga suspek si Joshua Alferez nga taga Bunga, Dakbayan sa Toledo nga daling gidala sa Vicente Sotto Memorial Medical Center apan gideklara nga dead on arrival.
Tungod niini, nilunsad og imbestigasyon ang Toledo PNP nga gipangulohan ni Alarcon apan nabantayan ang presensya sa kapulisan nga paingon sa balay ni Villarmia, ug sumala pa, giunhan sila og pagpusil.
Gikataho nga away sa ilegal nga drugas ang sinugdanan sa maong krimen diin nagsugod na sa miaging tuig sanglit pulos giingong drug personalities ang biktima ug ang mga suspek.
“Basi sa previous pa gyud nila nga conflict kanang either naglalis sila sa drugs or wala ba makabayad or nakabikil sila sa ilang area. Kana bitaw nga term nato nga onsehan kanang mga drug related nga shooting incidents,” matod ni Alarcon.
Nakakuha sila og duha ka armas sa dapit diin nahitabo ang engkwentro nga kalibre 45 ug 38 nga pistola sa lakip na mga drug paraphernalia ug timbangan sa ilegal nga drugas.
Giangkon ni Alarcon nga ang mga namatay ug mga gipusil nga nadala sa tambalanan mao ang mga target sa Toledo PNP sa ilang anti-illegal drug operation.
Gani ila na kining gi-transact apan wala molampos.
Si Villarmia makabaligya og 10 gramos nga gituohang shabu matag semana sa ilang lugar ug giila usab siya nga gun-for-hire, sumala sa iyang mga gipanghambog sa mga kaila. / DVG / AYB