Human sa pito ka mga tuig nga pagkaundang, mapahigayon og balik karong tuiga ang Gullas Tennis Cup nga dala ang usa ka panghinaot – makadiskubre og batan-ong magduduwa nga adunay potensyal nga makasunod sa lakang ni Filipina tennis ace Alex Eala.
Tipik kini sa mga nahisgutan dihang opisyal nga gilusad ang pagbalik sa kompetisyon pinaagi sa usa ka press conference sa University of the Visayas (UV) Multi Media Center sa dalan Sanciangko, Dakbayan sa Sugbo, ning Huwebes, Hunyo 26, 2025.
Ang pagbalik sa kompetisyon, nga magmarka sa ika-24 ka mga tuig niini, ipahigayon karong Oktubre 17-20, 2025 sa duha ka venues nga mao ang Alta Vista Golf and Country Club sa Barangay Pardo ug Citigreen Tennis Resort sa Barangay Punta Princesa, Dakbayan sa Sugbo.
Ang paglusad gitambungan sa pamilyang Gullas nga gipangulohan ni John Vicente “Johnvic” Gullas, iyang anak nga si JT, ug pag-umangkon nga si Jose Miguel “J-Mi” Gullas.
Kauban nila sila si sportsman John Pages ug tournament director Jun Tabura.
Nagkanayon si Johnvic nga nakadesisyon sila nga ibalik ang torneyo aron paghatag og gibug-aton sa legasiya nga naumol sa iyang amahan nga si anhing Jose “Dodong” Rivera Gullas, kinsa maoy nagtukod niini niadtong 1995.
Ang pamilyang Gullas, nga maoy tag-iya sa UV, nisaad nga kon aduna sila’y madiskubrihan nga potensyal nga makasunod sa lakang ni Eala, hayan dili sila magmakuli sa paghatag og kinatibuk-ang suporta.
“We hope, with this tournament, maka-develop ta’g someone like her (Eala),” matod ni Pages, kinsa nitabang sa pag-organisar sa torneyo sukad pa kaniadto. / ESL