USA ka laag nga iro nga kalit nilabang sa karsada ang nakamugna og aksidente nga naresulta sa pagdinasmagay sa duha ka sakyanan ug adunay mga naangol, sa highway, Sityo Labangon, Barangay Tulic, Lungsod sa Argao, Sugbo, alas 3:20 sa hapon, Pebrero 9, 2025.
Ang mga sakyanan nga nagkabangga mao ang Nissan Terra nga gimaniho ni Justin Ice Enopia Esma, 21, ulitawo, taga Freedom Street, Lahug, Siyudad sa Sugbo ug ang usa ka Nissan Urvan nga gimaneho ni Roel Ycong, 49, minyo, nga taga San Jose Purok V, sa Barangay Talamban, sa Siyudad sa Sugbo.
Nasayran sa Superbalita Cebu pinaagi ni PSSg Robinson Cornito, traffic police investigator sa Argao Municipal Police Station, nahibaw-an nga ang maong van gikan sa Siyudad sa Sugbo paingon sa Oslob nga may sakay nga mga turista apan pag-abot sa maong dapit may usa ka saag nga iro ang kalit nga nilabang ug gilihayan sa drayber nga si Ycong.
Nigawas sa iyang lane ang van diin gikasugat ang Nissan Terra nga gikan sa Dalaguete paingon sa Cebu City nga gimaniho ni Esma, niresulta sa head on collision.
Sa kakusog nga panagbangga nagusbat ang wala nga bahin sa Nissan Terra ug natangtang ang usa ka ligid.
Samtang ang Nissan Urvan nakaangkon usab og kadaot sa atubangan nga bahin.
Gitug-an ni PSSg Cornito nga may sakay sa van nga 60 anyos nga lalaki ug 7 anyos nga batang lalaki ang nangabun-og.
Dili ra hinuon grabe ang ka-daot nga naangkon sa mga biktima. / DVG