‘Gun-for-hire’ nga wanted sa murder nadakpan

Cebu City map.
Cebu City map.

Giila nga no. 3 most wanted sa regional level nga dunay kaso’ng murder nadakpan sa mga sakop sa Labangon Police Station sa pagpangulo sa hepe nga si Police Major Eraño Sanchez Regidor.

Nasikop alas 7:05 sa gabii, Martes, Mayo 14, 2024, sa Sitio Beltran, Barangay Quiot, dakbayan sa Sugbo ang akusado nga si Alvin Alegato, 27, taga Sitio Coles, Brgy. Quiot, Dakbayan sa Sugbo.

Ang Regional Trial Court (RTC 7) Branch 16 sa dakbayan sa Sugbo nipagawas og warrant of arrest nga pinitsahan og Marso 25, 2024 sa kasong murder nga walay piyansa nga gitugot.

Akusado siya sa pagpatay kang Regan Gañolon, 41, taga sityo Badiang, Brgy. Toong, Dakbayan sa Sugbo niadtong Nobiyembre 10, 2023.

Nahitabo kini sa Brgy. Quiot.

Matod ni Regidor nga human nila nakuha ang warrant of arrest ilang gi monitor ug nasuta nga nag tago-tago kini sa laing barangay ug mopauli panagsa sa Quiot.

Human makakuha’g kasa­yu­ran nga naa si Alegato sa Sitio Beltran, Brgy.Tisa dali, gipaalerto ang tracker team sa pagpangulo ni P/Lt. Col. Raymart Rabanes.

Dugang ni Regidor nga naila si Alegato nga tirador kun gun for hire sa mga nalambigit sa ilegal nga drugas.

Gawas niini, ang iyang ngalan nigawas nga notadong kawatan sa Quiot ug kasikbit nga mga barangay sa dakbayan.

Sa miaging tuig nadakpan na sa Mambaling Police Station si Alegato ug nasulod sa Cebu City Jail sa kaso sa ilegal nga drugas ug pagdala niini’g kutsilyo apan nakagawas ra usab kini.

Ning pagkasikop, giisip nga sulbad na ang kaso sa pagpatay ni Gañolon. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph