Babaye nga high value individual uban sa iyang mga kauban nga gitumbok nga mga gun for hire nangadakpan sa gilusad nga buy-bust sa Bohol Police Provincial Office sa alas 11:45 sa Dominggo sa gabii, Oktubre 22, sa Purok 3, Barangay Cabawan, Dakbayan sa Tagbilaran, Bohol.
Ang mga nadakpan giila sa mga saksi nga sila si Claire Maslog uban sa iyang mga kakunsabo nga sila si Mike Arong, Christian Ocon, Reymart Puagang ug Jose Arong samtang nakaikyas ang usa nga gihinganlan og Clark Cimafranca nga gitudlo sa mga residente nga nalambigit sa gun for hire sa Tagbilaran City ug tibuok probinsya sa Bohol.
Nakuha sa kapulisan ang 300 gramos sa gituohang shabu nga dunay standard drug price nga kapin sa P2 milyunes, lakip na ang tulo ka mga armas nga kalibre .45 nga pistola nga loaded og pito ka mga bala ug duha ka mga .38 caliber revolver nga dunay unom ka bala.
Sila si Mike Arong ug Cimafranca ubos sa pagpaniid sa kapulisan ug ubang law enforcement agencies sa Bohol human sila ang gitudlo nga responsabli sa pagpamusil niadtong Mayo 3, 2023 sa Loay, Bohol nga ang biktima mao sila si Hermes Barrete ug Razil Cagabcab.
Sila si Arong ug Cimafranca gipasakaan og kasong frustrated murder.
Gikataho nga ang duha gamiton unta sa nagsingabot nga Barangay and Sanguniang Kabataan Elections (BSKE).