Sa dihang nalutsan og search warrant ang usa ka 31 anyos nga lalaki nga gihulagway nga gun runner gidakop niadtong alas 11:40 sa gabii, Biyernes, Abril 11, 2025 sa Sitio San Roque, Barangay Lorega San Miguel, Siyudad sa Sugbo.
Ang maong suspek nga gialyasan og Ram ang gi-report nga namaligya’g armas ug magpahuwam sa iyang armas ngadto sa iyang mga higala.
Gumikan niini, gironda sa mga sakop sa Parian Police Station ubos sa pagpangulo ni Police Major Marvin Fegarido ang gipuy-an sa Sityo San Roque.
Ang maong subject nakuhaan og duha ka kalibre 22 ug duha ka bala sa kalibre 38.
Gawas sa pagka lambigit sa pagpamaligya og armas ang suspetsado usa usab matod pa siya ka drug personality.
Gipaubos sa monitoring ang maong subject ug sa dihang na konpirmar nga tinuod ang impormasyon mi-apply sila og search warrant sa korte nga giluwatan ni Judge Anacleto Debalucos, Executive Judge, Regional Trial Court Branch 17, Dakbayan sa Sugbo.
Kalapasan sa Republic Act 10591 ang ipasaka nga kaso sa Parian police station ug Comelec gun ban batok sa dinakpan.
Samtang nadakpan sab sa Abellana Police Station ang usa ka 24 anyos nga lalaki nga gialarma nga armado niadtong Biyernes, Abril 11, 2025, Barangay Sambag 2, Siyudad sa Sugbo.
Ang nadakpan giila nga si alyas Jun nga nagpuyo ra usab sa maong lugar nga nakuhaan og usa ka 38 nga kalibre sa pistola ug tulo bala niini. / AYB