Giila nga mamaligyaay og armas ug giingong badlungon sa ilang dapit, gi-entrap sa mga sakop sa Criminal Investigation And Detection Group Lapu-Lapu City Field Unit alas 12:30 sa Dominggo sa udto, Marso 10, 2024 sa Barangay Mompeller, Lungsod sa Argao.
Ang nasikop sa kapulisan giila nga si Rey Mark Tanaid Sarcauga, 26, taga Brgy. Anajao, Argao nga nakuhaan og kalibre .357 nga revolver.
Ang mga sakop sa CIDG-Lapu-Lapu City Field Unit nakadawat og report labot sa giingong pagpamaligya sa suspek og armas nga way lisensya sa dapit ug giila usab nga nalambigit sa ilegal nga drugas.
Dali nga nilusad og entrapment operation ang kapulisan pinaagi sa pagpalit sa armas ug sa dihang natunol na ang armas, siya gidakop dayon. /AYB