Usa ka lalaki nga namaligya og armas sa Sitio Tanguile, Barangay Busay, dakbayan sa Sugbo, nadakpan sa mga sakop sa Criminal Investigation and Detection Group (CIDG) Cebu City Field Unit alas 7:30 sa Huwebes sa gabii, Pebrero 1, 2024.
Ang suspek giila nga si Adrian Erro, alyas Adi, 21, taga Sitio Sambag II, Barangay Guadalupe, dakbayan sa Sugbo apan kasamtangan nga nag-abang og boarding house sa Sitio Tanguile, Barangay Busay.
Nakuha gikan sa suspek ang duha ka mga kalibre .45 nga pistola nga dunay magazine ug mga bala niini.
Ang CIDG Cebu City Field Unit sa pagpangulo ni Police Lt. Col. Randy Korett nakadawat og impormasyon nga ang suspek modawat og prenda nga armas.
Kon dili na malukat, iya usab kini nga ibaligya o iyang pailisan og ilegal nga drugas.
Siya usab ang gitumbok sa mga kaso sa tulis ug akyat bahay sa Busay, Lahug ug Apas diin ang iyang target nga tulison mao kadtong mga menor de edad.
Human nakuha ang tanang mga impormasyon, gilusad dayon ang buy-bust nga niresulta sa pagkasikop niini.
Kalapasan sa Republic Act 10591 o Comprehensive Firearms and Ammunition, ang giandam nga kaso sa CIDG batok sa suspek nga kasamtangang gibalhog sa custodial facility sa maong buhatan.
Ang kapulisan nagpadayon sa ilang hugot nga kampanya batok sa kriminadad labina sa pagkupot sa armas nga walay lisensiya.