Nadakpan na sa kapulisan sa dakbayan sa Sugbo ang giingong gunman nga nagpusil-patay sa usa ka lalaki nga gihigtan ang mga kamot og pisi sa manok ug gibiyaan sa bukirang dapit sa Barangay Sudlon 1, dakbayan sa Sugbo, niadtong Septiyembre 3, 2026.
Ang nasikop mao si John Elvis Catantan Gutobat, 31, e-bike driver ug residente sa Dimasalang Street, Barangay Pahina Central.
Siya ang gitudlo ug niangkon nga maoy nagpusil kang Leo Leaño, 57, nga taga Barangay Nangka, lungsod sa Consolacion.
Nasikop si Gutobat sa mga sakop sa Malubog Police Station 12 sa pagpangulo ni Police Captain Jurry Papasin didto sa Barangay Basak Pardo, alas 7:30 sa gabii, Dominggo, Septiyembre 6, 2026.
Giangkon ni Gutobat nga siya ang nagpusil makaduha ka higayon sa biktima subay sa mando sa usa ka alyas "Shaun" baylo sa suhol nga P10,000.
Gisulti niini nga gikan sa sulod sa Cebu City Jail ang nagmandong contact nga adunay "spotter" sa gawas.
Human sa krimen, nisibat si Gutobat paingon sa Daanbantayan apan nibalik aron motahan sa dihang nahibaw-an niya sa media nga ang iyang duha ka kauban nga si alyas "Ritchie", 30, e-bike driver, ug si alyas “Ace,” 49, niangkon na.
Si alyas Ritchie nga giingong mastermind ug maoy nagpalit sa pisi nga gihigot sa biktima, nasikop sa Barangay Ermita alas 3:00 sa kadlawon sa Septiyembre 5, samtang si alyas Ace, kanhi seaman nga maoy nag-drayb sa giabangang sakyanan, nasikop sa Cogon Pardo, pagka-alas 5 sa buntag sa samang adlaw.
Gipadayag ni Ace nga nakadawat siya og P8,500, samtang si Ritchie nakadawat og P7,000 isip suhol sa maong krimen. Gibutyag usab niya nga ang nagpusil sa biktima mao si Gutobat.
Nailhan ang mga suspek pinaagi sa backtracking ug GPS tracking sa giabangang Mitsubishi Mirage G4 sedan diin nakit-an usab ang mga mantsa sa dugo. Subay sa pamahayag sa mga suspek, gipukpok una sa martilyo sa ulo ang biktima sulod sa sakyanan samtang nagbiyahe tungod sa pagsige og siyagit, sa wala pa kini gipusil ni Gutobat sa Sityo Morga niadtong Septiyembre 3.
Gitan-aw sa kapulisan ang away sa yuta ug ang posibleng pagbalos sa giingong krimen nga nahimo sa biktima sa Samar isip mga motibo.
''Kasi itong tao na 'to sa pagkakarinig ko, meron siyang napatay doon sa lugar nila sa Samar na hindi siya nakonbikto. Pinatay niya yong tao tapos pumunta siya dito sa Cebu. Parang sa isip ko, gumanti yong pamilya,'' matod ni Ace.
“Nagmahay na gyud ko sir, nadala ra gyud ko sa kwarta. Sa pamilya pasayloa ko ninyo,” matod ni Gutobat.
“Kaduha nako napusilan sir, wala ko kabalo na buko-buko ba ang ikaduha sa tiyan na mao to nakaduhaan nako pagpusil kay sige man siyag singgit nga sige na kay mangadto nata,” saysay ni Gutobat.
Si Lt. Col. Gerard Ace Pelare, deputy city director for operation sa Cebu City Police Office, nagkanayon nga ang pagkasikop sa tulo resulta sa ilang walay hunong nga follow-up operation. Kasong Kidnapping with Murder ang ipasaka karong adlawa batok sa mga dinakpan. / AYB, JDG
