Nasikop sa kapulisan ang usa sa mga gunman sa nag-viral nga pagpamusil sa bus sa Nueva Ecija sa miaging buwan.
Nadakpan ang suspek nga si Allan Delos Santos sa Dilasag, Aurora niadtong Nobiyembre 20.
Iyang giangkon nga nalambigit siya sa walay kahadlok nga pagpatay sa duha ka mga tawo nga naglingkod atubangan sa bus sa Carranglan, Nueva Ecija niadtong Nobiyembre 15.
Usa ka video sa insidente, nga nakuha sa dash camera sa bus, nahimong viral.
Si Delos Santos, laing gunman ug usa pa ka kauban nga nagsilbi nga drayber, ingon man ang anak sa babaye nga biktima ug ang iyang live-in partner nga giingong nagsilbi nga mastermind, gipasakaan og duha ka mga kasong murder atubangan sa Korte sa Nueva Ecija niadtong Lunes, Disyembre 11.
Sa press conference niadtong Martes, Disyembre 12, si Central Luzon Police Office Director Colonel Richard Caballero niingon nga ang babaye’ng biktima nipasaka og kasong carnapping ug robbery batok sa iyang anak ug sa iyang live-in partner human kini giingong nikawat sa usa sa iyang mga sakyanan niadtong Pebrero ug nilungkab sa iyang panimalay sa Cauayan, Isabela niadtong Abril, mikuha sa mga titulo sa yuta ug kuwarta nga mokabat sa P2 milyunes gikan sa iyang vault.
Ang anak ug ang live-in partner nakapiyansa niadtong Septiyembre, sa samang buwan, sumala ni Delos Santos, nga sila gikontak alang sa pagpatay sa mga biktima.
Si Delos Santos niingon nga gibayran sila og P60,000 sa pagpatay sa matag biktima. Nakadawat sila og pasiunang bayad nga P20,000.
Giawhag sa gunman ang ubang mga suspek nga mosurender.
Una nang nanghimakak ang anak sa babaye nga biktima sa krimen. / TPM sa SunStar Philippines