Nakuhaan og unom ka mga armas nga way lisensiya ang usa ka tawo nga ila sab nga nasikop sa pagpayuhot og gidiling drugas atol sa buy-bust sa kapulisan sa Brgy. Lagtang, Siyudad sa Talisay sa alas 2 sa hapon, Martes, Hunyo 11, 2024.
Ang suspek giila nga si Evelio Trongcao Abad, hamtong, ulitawo, dunay kapuyo, lumolupyo sa Sityo Laray, Brgy. San Roque, Dakbayan sa Talisay.
Si Evelio nakuhaan og gituhoang nga shabu nga nitimbang og 15 gramos ug gibana-bana nga mokantidad og P102,000.
Nasakmitan usab siya og tulo ka 9mm pistols nga may magazine ug mga bala, duha ka .38 kalibre nga revolver ug usa ka .22 caliber revolver.
Nakadawat og impormasyon ang kapulisan sa pagpamaligya og paltik nga armas ni Abad.
Dihang ilang nakompirmar, gilusad dayon ang buy-bust, gipalitan sa undercover police gamit ang P15,000 nga peke nga kwarta nga gipaibabwan og tinuod nga P500.
Matod pa, ang suspek nagsugod sa iyang pagpamaligya og shabu sa Enero ning tuiga sa Brgy. San Roque ngadto sa Barangay Tabunok.
Ang suspek, matod pa, gawas sa kuwarta nga ibayad sa shabu sa mamalit kaniya, modawat usab siya og armas isip bayad. Ang suspek gikatakdang pasakaan og tukmang mga kaso sa kapulisan.
Sa lain bahin, usa ka drug pusher nasikop sa buy-bust sa kapulisan sa Sitio Baybay 1, Brgy. Poblacion, dakbayan sa Toledo, alas 11:22 sa gabii sa Martes, Hunyo 11, 2024.
Ang suspek giila nga si Jessie Alforque Laput, 37, minyo, nagpuyo sa maong dapit. Nakuha gikan sa iyang posisyon ang upat ka gagmay’ng putos, upat ka medium nga putos sa shabu, P300 buy-bust money, ug P400 cash. Ang drugas motimbang og 21.12 gramos nga mobalor sa P143,616.
Ang suspek gikatakda nga pasakaan sa kapulisan sa tukmang kaso. / DVG / GPL