Daw natagam kadtong guwardiya sa pawnshop sa Dakbayan sa Danao nga nailogan og pusil sa gituohang tulisan niadtong Biyernes, Hunyo 27, 2025 kay nakahunahuna na lang kining moundang sa trabaho.
Gisuwayan og pusil si Alberto Lacio, 66, minyo, sa niilog sa iyang armas nga si Argie Catipay, 24, lumad nga taga Negros, suwerte na lang kay wa makabuto.
Matod sa guwardiya nga niadtong Biyernes, Hunyo 27, mga alas 11:40 sa kabuntagon, nipalit siya og softdrink sa tindahan nga tapad ra sa iyang gitrabahuan, kalit lang nga adunay nikuha sa iyang armas nga gitakin sa holster.
Dihang nakuha ni Catipay ang pusil, nisuway og bawi ang guwardiya apan gitiunan siya tumong sa tiyan dayon gikablit sa suspek ang armas apan wa makabuto.
“Murag ikaduha na gyud nako ning kinabuhi, kay pagkablit niya ug nibuto pa sus patay ko,” dugang sa gwardiya.
Daling nakuha ni Catipay ang armas gikan sa gwardiya tungod kay ang holster niini way lock.
Gipahibawo ni Lacio nga duha ka semana na ang nilabay, ang maong tulisan nianha sa pawnshop ug nangayo og bala apan iyang gibalibaran.
Nakadagan palayo si Catipay ug gigukod ni Lacio apan wa kini maabti tungod sa kakusog modagan. Daling nakatawag og polis ang mga nakasaksi sa panghitabo hinungdan nga niresponde si Patrolman Mark Gomer Ornopia nga maoy nigukod apan ang suspek kalit lang namusil sa pulis hinungdan sa kamatayon niini.
Tungod sa nahitabo, ang guwardiya nihangyo sa iyang pamilya ug sa iyang amo nga moundang sa trabaho og manguma na lang sa bukid sa Danao. Siyam na ka tuig nga nagtrabaho sa pagkaguwardiya si Lacio. /