Namatay diha-diha ang security guard sa usa ka Business Process Outsourcing (BPO) nga kompanya human matod pa nagpusil sa iyang kaugalingon sa may Barangay Kasambagan, Dakbayan sa Sugbo mga alas 7 pasado sa buntag, Lunes, Mayo 19, 2025.
Ang namatay nailhan lang sa alyas nga Jack, lumad nga taga Lungsod sa San Remegio.
Subay sa gihimong imbestigasyon sa Mabolo Police Station, gikataho nga gikuhaan na og ‘service firearm’ ang maong sikyu tungod kay giingon’g nisuway siya pagkutlo sa iyang kinabuhi niadtong Biyernes, Mayo 16, 2025.
Apan pagka Lunes sa buntag, dihang paingon na siya nga morelibo sa iyang kauban, nakit-an niya ang armas sa iyang kauban nga gibilin samtang namahaw.
Gikataho nga gikuha ni Jack ang maong armas nga gituohang maoy iyang gigamit sa pagkutlo sa iyang kinabuhi.
Sa dugang pakisusi, gisuwayan pa og ilog sa usa ka security guard ang armas nga 9mm gikan sa namatay apan napakyas.
Sa kasamtangan, gipalawman sa kapulisan ang ilang imbestigasyon aron sutaon kon tinuod ba ang mga nanggawas nga taho nga adunay giatubang nga personal nga problema ang maong guwardiya.
Sa kadtong nag-antos og depression ang Philippine Mental Health Association, Inc. Cebu Chapter nagtanyag og online psychiatric ug psychological services. Mamahimong matawgan ang mga mental health professionals sa mobile number nga 0917-655-0023; pmhacebu1950@gmail.com, Lunes ngadto sa Biyernes, 8AM-5PM. Mamahimo sab nga tawgan ang Tawag Paglaum Centro Bisaya, 24/7 call-based hotline alang sa suicide prevention ug emotional crisis sa numero 0939-937-5433; 0939-936-5433 ug 0927-654-1629. / JDG