Nihatag si outgoing Cebu Governor Gwendolyn Garcia og usa ka kalma ug kinasingkasing nga farewell speech sa Capitol Social Hall sa Sabado sa gabii, Hunyo 28, 2025, duha ka mga adlaw sa dili pa siya opisyal nga moluwat sa katungdanan sa udto sa Lunes, Hunyo 30.
Nailhan sa iyang mainiton ug madasigon nga mga pamulong sa publiko, gisurpresa ni Garcia ang kadaghanan sa iyang kalmado nga pakigpulong samtang nagpasalamat siya sa mga ahensya sa nasudnon nga gobiyerno, pribadong mga kaabag, ug sa mga Cebuano sa walay paglubad nga suporta niini sa tibuok niyang administrasyon.
“I had fought the good fight, I had stayed the course, I have kept the faith and these words continue to rip in my mind,” matod ni Garcia, kinsa nagbalik-lantaw sa iyang pag-turnover ngadto ni Hilario Davide Jr. lll sa iyang katapusang termino niadtong 2013.
Niadtong 2013, gipilde ni Davide sa pagka-gobernador ang kandidato sa pamilyang Garcia nga si Pablo Jonh Garcia (igsuon ni Gwen), nga maoy nagtuldok sa 18 ka mga tuig nga paghupot sa pamilyang Garcia sa probinsya.
Bisan pa man og moluwat sa katungdanan, gipasaligan ni Garcia ang mga nanambong nga ang iyang pagbiya dili permanenteng panamilit.
“Goodbyes are not forever. Goodbyes are not the end. It simply means I’ll be missing you until we meet again,” asoy ni Garcia.
Gitapos ni Garcia ang iyang mensahe pinaagi sa pagsulti sa linya nga gipasikat ni Arnold Schwarzenegger, “Hasta la vista, baby," nga usa ka Espanyol nga mga pulong nagpasabot og “hangtod sa sunod nga panagkita.”
Nanumpa ang mga Board Member sa One Cebu
Usa ka highlight sa gabii mao ang pormal nga pagpanumpa sa bag-ong napiling mga Board Member sa Probinsya sa Sugbo ubos sa partidong One Cebu uban ni Garcia isip administering officer.
Ang seremonya, nga gitambungan sa outgoing board officials, nagpamatuod nga nagpadayon ang paghupot sa partido sa lehislatibong kalihukan sa probinsya.
Ang bag-ong mga miyembro nanumpa nga moalagad uban ang integridad ug ipatuman ang interes sa ilang tagsatagsa ka distrito.
Kabilin sa Maayong Pagdumala
Giklaro ni incoming board member Malcolm Sanchez, kinsa morepresentar sa nag-inusarang distrito sa Mandaue City, nga ang panumpa nga ilang gihimo labaw pa sa usa ka simbolo.
“This oath-taking is not merely ceremonial. It is a solid purpose and declaration to serve, to listen, and to lead,” asoy ni Sanchez.
Nagpasalamat si Sanchez kang Garcia sa pagdumala sa ilang panumpa ug sa pagpasa sa “legasiya sa maayong pagdumala”, nga nagdasig sa Cebu nga mas molambo pa.
Gipadayag usab ni Sanchez ang iyang pagpasalamat sa suporta sa mga national agencies ug mga lider sa negosyo nga nakahimo sa kalamboan sa Sugbo.
Lakip sa mga nanumpa sila si Antonio “Jojo” Bacaltos Jr. ug Lakambini Reluya gikan sa 1st District; Stanley “Doc Stanley” Caminero ug Raymond Calderon gikan sa 2nd District; Julius Anthony “Oloy” Corominas ug Dason Lorenz Lagon gikan sa 3rd District.
Nanumpa usab sila si Kerrie Keane Shimura ug Nelson Mondigo gikan sa 4th District; Andrei “Red” Duterte ug Michael Joseph “Mike” Villamor gikan sa 5th District; Dason Larenz Lagon ug Alfred Francis “Alfie” Ouano gikan sa 6th District; ug Paz “Lingling” Rozgoni ug Cesar “Sarsi” Baricuatro gikan sa 7th District.
Alang sa bag-ong nahimo nga bugtong distrito sa Mandaue City, sila si Malcolm Sanchez ug Nilo Seno nanumpa usab isip opisyal nga mga miyembro sa Provincial Board.
Sa laing bahin, nagpasalamat si Vice Governor-elect Glenn Anthony Soco kang Garcia.
“Your presence is not only an honor but more importantly, a reminder for us of the commitment and responsibility,” pasabot ni Soco.
Nanumpa si Soco nga makigtambayayong sa iyang mga kauban nga board member sa pagpalambo sa kolaborasyon ug sa pagserbisyo uban sa “pagkaubsanon, integridad, ug kahusayan.”
Si Soco ang kasamtangang board member sa ikaunom nga distrito.
Sa iyang bahin, si Board Member Red Duterte nihulagway ning pagbiya sa outgoing administration nga usa sa labing di malimtan nga panahon sa kasaysayan sa Sugbo.
“You can say that these six years were memorable, sometimes controversial… but I think we can all agree, it was never dull,” batbat ni Duterte.
Gitumbok ni Duterte nga ang pagpatuman ni Garcia sa nagkadiyang mga programa nakahatag og kaayuhan sa mga Sugboanon. / CDF