Gwen: Mag-unsa man ko diha? I have my own office
Gipanghimakak ni outgoing Governor Gwendolyn Garcia nga mag-opisina siya sa legislative building human sa iyang pagbiya sa kapitolyo.
“Why? Mag-unsa man ko diha? I have my own office. Wa ra siya kahibawo and that will be, I will be tending to my own private businesses. In fact, that will be in Mandaue so di siya maguol kay di ko kinahanglan magpalibre kay naa koy opisina sa Oakridge. Ka-insecure man, kaalegre intawon,” matod ni Garcia.
Nag-ung-ong sab ang pangutana sa upat ka mga nasudnong ahensiya kon magpabilin ba kini sa naandan o mobalhin gikan sa nahimutangan niini sa Legislative Building sa Capitol Compound sa Dakbayan sa Sugbo. Ang naasoy nga building gitakda nga ayuhon aron mahatagan og lugar nga mapanindot ang kasamtangang edipisyo.
Si Cebu Governor-elect Pamela “Pam” Baricuatro nipahibalo nga nakadawat siya og impormasyon nga ang Commission on Elections (Comelec), Commission on Audit (COA), Department of Agrarian Reform (DAR), ug ang Department of Interior and Local Government (DILG) nga kasamtangang namasilong sa legislative building giingong gihangyo ni Garcia nga pabalhinon aron paghatag og lugar sa opisina ug mga kalambuan nga gustong himuon ni Vice Governor-elect Glenn Soco.
NAGBUOT-BUOT?
“It has come to our attention that the outgoing governor has requested the national offices of COA, COMELEC, DAR and DILG to vacate their respective offices in the legislative building, aiming to convert the office under the Office of the Vice Governor,” matod ni Baricuatro diha sa iyang post sa social media.
Si Garcia nipasabot nga wala gipugos pagpapahawa ang maong mga buhatan sa naasoy nga edipisyo.
Matod niya nga ang maong desisyon nagsugod subay sa hangyo ni Vice Governor-elect Glenn Soco nga hatagan og dignidad ang buhatan sa legislative department aron mas han-ay ug disente kining modawat og mga bisita ug mopahigayon ug mga kalihukan, meetings, ug uban pa.
Giklaro ni Garcia nga sa upat ka mga opisina, giingong ang DAR lamang ang nag-abang og moabot sa usa ka milyon ka pesos sa kagamhanan sa Lalawigan sa Sugbo matag buwan.
“...nagpatabang tawon ni si Vice Gov-elect Glenn Soco nga legislative. Legislative gyud kana ba sa sad untang nay dignidad ba kay nahimo na man gud nang bodega na. In the past, di ko manghilabot kay that is really sa Vice-Gov man gud na nga pagbuot but he really reach out for help, that is why niadto ko, ” matod ni Garcia sa Hunyo 25, 2025, pinaagi sa tawag.
Personal nga nisusi sa legislative building sa Lunes, Hunyo 23, si Garcia nga gisundan sa usa ka tigom kauban ang concerned agencies.
Subay sa iyang pagsusi, giingong iyang naobserbahan ang kadako sa lugar nga giokupar sa pipila niini, apan ang anaa sa sulod pulos mga gitapok nga mga papel ug butang.
Giingong nagkahiusa ang mga ahensiya sa maong tigom nga mobalhin kini sa Palace of Justice nga anaa nahimutang atbang sa Legislative building sulod sa Capitol compound.
Sa nasayran, ang maong edipisyo giabandona gumikan sa nakitang mga liki atol sa pag-igo sa 7.2 nga linog sa 2013 nga gisundan sab sa Super Typhoon Yolanda.
Niadtong 2019, una na nga gipadayag ni Garcia ang tinguha niining pagpasusi sa karaan nga Palace of Justice aron masuta kon unsa ang angayang ayuhon o ba kaha bag-uhon aron magamit ug mabuksan ang mga opisina alang sa mga ahensiya ug ubang sector.
Samtang si Vice Governor-elect Glenn Anthony Soco sa iyang bahin, niingon nga ang maong hisgutanan nagsugnod lamang og hulga sa pagkabahin-bahin.
Iyang gidugang nga aron mahatagan og katin-awan, mas maayo kon hisgutan kini pinaagi sa pormal nga diskusyon sa mga hingtungdan kaysa diha sa social media.
WAY BASEHANAN
“Any insinuation that these offices are being reassigned for the personal use of outgoing Governor Gwendolyn Garcia is entirely baseless and unnecessarily fuels premature speculation and division,” matod ni Soco.
Kon mahinayon ang himuong pagpanindot sa legislative building, lakip sa ipahimutang niini ang tagsa-tagsa ka committee conference rooms nga may hiniusa nga sukod, media lounge, lugar diin makadangop ang mga kapitan ug mga konsehal ug ang uban pang mga bisita.
Sa kasamtangan, unang gipaayo ang session hall aron paghatag og dugang lugar sa madugang nga mga board members sa pagbukas sa 17th Sangguniang Panlalawigan.
Gipasabot niya nga ang maong kasabutan, nahisubay pa sa iyang termino sa dili pa siya mokanaog sa Hunyo 30, 2025.
Subay sa nahisgutang pagkanaog, si Garcia inanay na sab nanghakot sa iyang mga gamit aron ibalhin sa iyang opisina sa usa ka dakong hotel sa Dakbayan sa Mandaue .
Mobalik si Garcia sa pagdumala sa negosyo sa ilang pamilya sama sa Gwen Garcia Codilla Group Inc., GGC Enterprises sa Ormoc City, Leyte; ug uban pa niining mga patigayon.
Matod ni Garcia nga dili niya kinahanglan nga mangayo og lugar sa legislative building tungod kay duna siyay kaugalingong opisina.
“So basically we will have another office gyud nga all the furniture nako and everything ibalhin namo tanan ngadto sa 8th floor sa Oakridge, medyo ka-afford pa intawon ko oy nga dili ko kay if ang iyang nailhan gusto lang pirme manglibre unya ingon ana pod ka bakya excuse me, intawon oy,” pasabot ni Garcia.
Apan bisan pa niini, gihimug-atan ni Baricuatro nga naghatag og dugang pangutana ang pagpabalhin ni Garcia sa mga national government agencies nga naghatag og serbisyo sa mga Sugboanon.
“Those offices are occupied by national agencies that are serving our constituents and are rented by the government. It is not acceptable to prioritize your office space at the expense of these agencies and the services they provided,” matod ni Baricuatro.
Giklaro ni Baricuatro nga isip umaabot nga gobernador, giingong hatagan niini og prayoridad ang mga buhatan sa gobiyerno nga maghatag og dugang serbisyo sa mga Sugboanon. / ANV