Gisaway ni Gobernador Gwendolyn Garcia ang paspas nga pagpagawas sa Office of the Ombudsman sa iyang unom ka buwan nga preventive suspension.
Sa usa ka press conference, si Garcia niinsister nga di siya manaog sa Kapitolyo.
Si Garcia, kauban sa iyang legal consultant Atty. Rory Jon Sepulveda nikompirmar niadtong Sabado, Mayo 3, 2025, nga nadawat nila ang kompletong kopya sa reklamo, sa labing unang higayon.
Ang Ombudsman nipahamtang og unom ka buwan nga preventive suspension ni Garcia tungod sa paghatag og special permit alang sa desilting activities sa Mananga River sa Talisay City, usa ka protected area atol sa 2024 El Niño phenomenon.
Ang reklamo ni Moises Garcia Deiparine, nagpasangil og pangabuso sa gahom ni Garcia tungod sa iyang aksyon niadtong 2024.
Sa press conference sa Cebu Provincial Capitol, si Garcia ug Sepulveda nikwestyon sa timeline sa pagpatuman sa preventive suspension order.
Si Sepulveda nga nipakita sa kopya sa reklamo ngadto sa media nagkanayon nga ang reklamante nisang-at niini sa Lunes, April 21.
Ang kampo ni Garcia nakadiskubri sab nga ang Ombudsman nipirma sa preventive suspension order human sa tulo ka adlaw gikan sa pagsang-at, Huwebes, April 24.
Gi-serve ngadto ni Garcia ang suspension order, April 28, ug human sa duha ka adlaw usa ka “special team” nga gilangkuban sa mga imbistigador ang natukod.
Si Sepulveda nikwestiyon nganong usa ray nipirma sa suspension order.
“As the Governor [has] noted, we have noticed the inordinate interest of the person or official of the Ombudsman of this case,” matod ni Sepulveda.
“The order only appears [in] one signature…Now it is clear that it is only by himself alone without any assistance or intervention of any other Ombudsman official,” iyang gidugang.
Si Garcia nga nakapadangat na og clarificatory letter ngadto sa Department of the Interior and Local Government,niingon nga mohimo siya og aksyon agig tubag sa kamanduan sa Ombudsman.
Niadtong Biyernes, May 2, si Ombudsman Samuel Martires nimando ni Garcia nga tubagon ang unom ka buwan nga preventive suspension tungod sa mga kalapasan sa grave misconduct may kalabutan sa iyang paghatag og special permit sa usa ka contractor.
Si Martires wa na masurprisa sa pamahayag ni Gobernador Garcia nga di manaog sa katungdanan tungod kay gisupak man sab niya kaniadto ang mga nangagi nga kamanduan.
Niadtong 2008, si Garcia gireklamo kalabot sa transaksyon sa Balili property ug gihukman nga taktakon niadtong 2018 ni kanhi Ombudsman Conchita Carpio-Morales apan nagpabilin sa buhatan hangtod sa 2019, tungod kay ang House of the Representatives wa mopatuman sa dismissal order.
Gipatin-aw sab ni Martires nga ang iyang buhatan makiangayon ug way gidapigan dihang niluwat siyag desisyon pagsuspenso ni Garcia ug wa kini kalabutan sa umaabot nga May 12 midterm elections.
Ang gobernador nga nibasa sa duha ka sunodsunod nga pamahayag ni Martires nagkanayon nga ang Ombudsman “grossly misinformed.”
“Is this a habit of the Ombudsman? Because I am now seeing statement after statement that are quite incomplete in facts,” matod ni Garcia.
Subay niini, mapasalamaton si Garcia sa suporta nga gipakita ni Presidente Ferdinand “Bongbong” Marcos Jr.
Si Marcos nipagawas og pamahayag nga nanawagan sa pagpatunhay sa rule of law ug nitataw sa kamahinungdanon sa kaangayan.
“A suspension order just 12 days before an election…We know very well what impact it can have on the electorate, and we cannot reach everyone. Explain to each and everyone what this is. But when the president speaks, everyone listens,” pasabot ni Garcia.
Si Garcia nanaad nga iyang kwestiyunon ang pagsuspenso kaniya ug niinsister nga nakalapas kini sa Omnibus Election Code tungod kay wa kini iagi sa Commission on Elections (Comelec) ug wa siya hatagi og due process. / DPC