GISALIKWAY ni Cebu Governor Gwendolyn Garcia ang mga bash diha sa social media nga nisaway sa iyang liderato nga giingong walay nahimo ug angayan nang ilisan.
Atol sa iyang pakigpulong sa proclamation rally nga gipahigayon sa Panphil B. Frasco Memorial Sports Complex, Lungsod sa Liloan niadtong Biyernes, Abril 11, 2025, gisumbalik ni Garcia ang mga basher ug ni-highlights sa iyang mga programa ug proyekto nga nahimo sa lalawigan.
Ang Liloan maoy unang gihunongan sa kampanya sa One Cebu Party sa amihanang bahin sa Sugbo, uban niya si Board Member Glenn Soco nga nidagan pagka Bise Gobernador, si Cebu 5th District Rep. Duke Frasco ug ang iyang asawa nga si Tourism Secretary Christina Frasco, ug mga nominado sa Ako Bisaya Partylist nga sila Sonny Lagon (First Nominee) ug Carissa Garcia (Second Nominee).
Apil sab sa nitambong ang mga kandidato sa Senado nga sila Panfilo Lacson, Manny Pacquiao, ug Tito Sotto.
Nagplano ang ilang grupo og duha ka adlaw nga motorcade ug proclamation rally sa amihanan nga mga lungsod ug siyudad, lakip na ang mga isla sa Bantayan, Madridejos, ug Santa Fe.
MGA NAHIMO
Sa iyang pamulong niadtong Biyernes, niingon si Garcia nga hapit 800 ka kilometro nga mga kalsada ang ilang gipatangtang ug gibetohan og konkreto sa lainlaing mga barangay ug hilit nga mga lugar sa probinsiya.
Apil sa uban pang imprastruktura nga proyekto ang pag-renovate sa mga barangay hall, pagtukod og mga covered court ug taytayan, ug pagpangbutang og solar-powered nga suga, tanan sulod sa unom ka tuig sukad sa iyang pagbalik sa puwesto niadtong 2019.
Nabuhat kining mga proyekto bisan pa sa kadaot nga gidala sa bagyong Odette niadtong Disyembre 2021 ug sa pandemya sa COVID-19 niadtong 2020.
"Tan-awa karon ang mga kalungsoran ug mga dakbayan kay nindot na gyud kaayo," matod ni Garcia.
Iyang giila ang quarterly nga Caravan of Services diin ang mga serbisyo ug programa sa Capitol ug ubang ahensiya sa gobiyerno gidala mas duol sa mga lungsod ug component cities.
Mga programa sama sa SugboNegosyo, Sugbo Kahanas, Sugbusog, ug ang Enhanced Countryside Development Program natukod aron matabangan ang gagmay nga negosyante, mag-uuma, ug mga mangingisda.
Matod pa ni Garcia nga ang katuyoan mga online troll, fake account, ug bots mao ang magpakatap og mga fake news aron nga gub-on ang iyang maayong rekord sa pagdumala sa lalawigan.
Iyang giklaro nga wala siya magpapili nga gobernador kon wala’y pagsalig ang mga tawo sa iyang liderato.
Gisaway sab niya ang saad sa iyang kaatbang nga mohatag og P500 matag buwan o P6,000 matag tuig nga honorarium sa mga Barangay Health Worker (BHW).
Matod ni Garcia, ang kasamtangang mga BHW nakadawat na og P6,500 matag tuig, ug gitinguha nga pasakaan kini og P7,500.
Si Garcia nga nangandoy sa iyang ikatulong sunodsunod ug posibleng ikaunom nga termino isip gobernador sa sulod sa 20 ka tuig, nagpakita sa iyang tinuoray nga dedikasyon sa Sugbo.
Ang iyang kaatbang nga si Pamela Baricuatro, usa ka philanthropist ug kanhi flight attendant nga giendorso ni kanhing Presidente Rodrigo Duterte.
Ang Sugbo adunay kapin sa 3.7 milyon nga rehistradong botante, lakip na ang mga lungsod sa Cebu, Lapu-Lapu, ug Mandaue nga gihulagway nga usa sa mga botante-rich nga mga probinsiya. (EHP)