Niumol na og kaugalingong transition team si Cebu Governor Gwendolyn Garcia subay sa giluwatan niini nga Executive Order No. 16 nga nagmando sa ilang kaugalingon nga Local Governance Transition Team (LGTT) alang sa Lalawigan sa Sugbo sa Mayo 20, 2025.
Mangulo sa maong transition team si Garcia ug Vice-chairperson niini si outgoing Vice-Governor Hilario Davide III.
Samtang miyembro sa LGTT mao ang tanang department heads sa kapitolyo lakip si Atty. Pulchra Marie Acevedo isip Secretary sa Sangguniang Panlalawigan, Mark Anthony Ynoc nga pangu sa Mandaue Chamber of Commerce and Industry.
Apil sab isip Secretariat si Nerces Bispo ug June Ilyn Terado.
Subay sa maong lagda, lakip sa gimando sa gobernador ang paghimo og inventory sa tanang propriedad sa kalungsoran lakip ang mga sakyanan, equipment office supplies ug uban pa.
Apil sab ang pagseguro sa tanang mga dokumento ug records sa LGU lakip na ang Commission on Audit (COA) report sa 2024, contracts ug loan agreements, comprehensive development development plan, annual budget , statement og indebtedness, payments and balances, ug uban pa.
Pagpangandam ug pagsumiter sa Final Transition Report (FTR) nga nag-outline sa tanang kalihukan nga nahimo, gaps ug challenges ug ang mga lakang nga girekomendar alang sa pag-transition niini subay sa pakig-alayon sa Department of Interior and Local Government (DILG) ubos usab sa Bureau of Local Government Supervision.
Ang tanang mga sakop nga naglangkob a LGTT ug uban pang mga opisina gimanduan sa pagtuman ug pagkompleto niini sa dili pa ang Hunyo 30, 2025, nga maoy gitakda nga turnover ceremony.
Subay niini, giawhag sab ni Garcia ang mga kalungsoran sa pagsubay sa lagda sa DILG alang sa hapsay nga transition sa mga mohulip sa katungdanan.
Sa nasayran si Cebu Governor-elect Pamela “Pam” Baricuatro nihimo na og transition team sa Mayo 19, diin siya sab ang mangulo. / ANV