Gwen: Usa ka water treatment facility ‘nakalapas sa balaod’

File photo
Cebu Gov. Gwendolyn Garcia.File photo

Usa ka water treatment facility nga nag-operate duol sa Lusaran River sa dakbayan sa Sugbo, nasuta nga nakahimo’g daghang kalapasan sa kinaiyahan base sa bag-o nga findings sa Environmental Management Bureau (EMB) 7.

Ang mga opisyal sa JE Hydro Plant ug Bio-Energy Corp., nga nahimutang sulod sa Central Cebu Protec­ted Landscape, gipatawag sa tigom uban ni Gobernador Gwendolyn Garcia sa Kapitolyo niadtong Huwebes, Mayo 23, 2024.

Gipahibalo ni Mary Ann Bueno sa EMB 7 ang gobernador sa ilang mga nadiskobrehan.

Matod ni Bueno, ang kompanya nga nag-supply og tubig sa Metropolitan Cebu Water District (MCWD) nagtukod og dugang lagoon ug bato nga embankment tabok sa Lusaran River, nga dili kabahin sa iyang giaprobahan nga Site Development Plan ubos sa ilang environmental compliance certificate (ECC).

Gitumbok ni Bueno nga gipalapdan sa kompanya ang lugar sa proyekto nga wala makakuha og bag-ong ECC o ang pagpahigayon sa lain nga pagsusi sa posibleng epekto sa kalikopan.

Siya niingon nga ang dugang lagoon, nga makasud og 200,000 cubic meters nga tubig gikan sa Lusaran, adunay negatibong epekto sa suba sa ubos nga agianan nga nag-supply og tubig sa mga barangay ngadto sa kasikbit nga lungsod sa Asturias ug Balamban.

Gimandoan ni Garcia ang EMB 7, Provincial Engineering Water District ug ang Provincial Environment and Natural Resources nga susihon pag-ayo ang pasilidad aron matubag dayon ang isyo.

Ang tigom niadtong Huwebes, Mayo 23, gitambongan usab ni MCWD general ma­nager Edgar Donoso.

Ang gobernador unang mi­padangat sa maong butang atol sa press conference niadtong Mayo 17 human niya mahibaw-i ang dugang lagoon ug bato nga embankment.

Nihangyo siya sa EMB 7 nga susihon ang pasilidad kon nakatuman ba kini sa environmental regulations tungod kay nagtuo siya nga ang gihimong kausaban gidudahan nga adunay kalabotan sa pagkunhod sa suplay sa tubig sa mga lungsod sa Balamban ug Asturias.

Ang JE Hydro kasagarang nagsuplay og 30,000 cubic meters nga tubig kada adlaw sa MCWD. Apan tungod sa dugay nga hulaw nga resulta sa El Niño phenomenon, nius-os kini ngadto sa 7,059 cubic meters matag adlaw, niadtong Mayo 16.

Ang kakuwang sa uwan ​​niining milabay nga mga buwan maoy nakapahubas o nakapaus-os sa supply sa MCWD.

Kini maoy nakaaghat sa Kapi­tolyo nga sugdan ang pag-desil ug pagkalot sa Mananga River sa Talisay City ug sa Luyang River sa amihanang lungsod sa Carmen aron maminosan ang deposit sa produksiyon sa tubig sa MCWD nga maoy nagsuplay sa mayoriya sa mga konsumidor niining mga da­pita. / EHP

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph