Wala ikatingala sa bag-ong Gobernador sa Sugbo, Pamela Baricuatro nga wala motunga si kanhi Gobernador Gwendolyn Garcia atol sa seremonyal nga turnover sa Kapitolyo sa Lunes, Hunyo 30, 2025.
Sa usa ka mubo nga interbyu sa media human sa seremonya, gibutyag ni Baricuatro nga walay kooperasyon gikan sa kanhi administrasyon sa proseso sa transisyon.
“Wala ko matingala, considering nga ang atong transisyon wala nahitabo,” ingon niya.
“Supposedly, kon nahatag pa ang transisyon pila na ka semana ang milabay, daghan na unta ta’g nahimo karon... iya nang pilion,” matod ni Baricuatro.
Nagpasalamat si Baricuatro kang Garcia sa iyang serbisyo ug niingon nga panahon na sa pagpadayon.
“Ang uban butang biyaan na lang, ang uban ‘has beens.’ Molihok na ta, mopadayon na ta, ug moserbisyo sa katawhan,” ingon niya.
Gikatakda ang bag-ong gobernador nga mopahigayon sa iyang inagural nga sesyon sa Kapitolyo sa Martes, Hulyo 1.
Mahitungod sa kaugmaon sa mga job order employees sa Kapitolyo, matod ni Baricuatro nga susihon ang ilang performance aron mahibaw-an kon kinsa ang ipabilin.
Gitubag sab sa gobernador ang mga kabalaka bahin sa politikanhong affiliation ug gikumpirmar ang iyang padayon nga suporta kang kanhi Presidente Rodrigo Duterte apan giklaro nga ang iyang administrasyon mahimong inclusive.
“Kini mahimong usa ka walay kolor nga administrasyon. Ang akong prayoridad mao ang katawhan sa Probinsiya sa Sugbo... kinahanglan ta magtrabaho,” ingon niya.
Sa wala pa ang seremonyal nga turnover, gibutyag ni Baricuatro nga naglakaw siya ug nag-ampo nga nagkupot og rosaryo.
Iyang gihulagway ang turnover nga “tam-is” ug giila ang kabug-at sa mga responsibilidad nga gitugyan na karon kaniya. / JPS