Napusasan ang usa ka habal-habal driver human makuhai og unom ka kilo sa gituohang shabu atol sa buy-bust operation sa mga sakop sa PNP Regional Drug Enforcement Unit 7 (RDEU 7) sa Sitio Arko Ali, Brgy. Labangon, Dakbayan sa Sugbo alas 7:52 sa Lunes sa gabii, Hunyo 3, 2024.
Ang suspek giila nga si Joey Barandog Iñego, 36, alyas Jojo, taga Purok 1, Brgy. Calabnugan, lungsod sa Sibulan, Negros Oriental.
Nakuha gikan kaniya ang dagkong putos nga adunay su’d nga gituohang shabu nga motimbang og unom ka kilo nga dunay standard drug price nga P40.8 milyunes.
Sa imbestigasyon sa kapulisan nasayran nga si Iñego nalakip sa Top 10 Priority List sa mga Regional High Value Individual.
Giingong nabutang nga big time drug pusher si Iñego diin siya ang nag-manage sa supply sa ilegal nga drugas sa usa ka inmate nga naa sa New Bilibid Prison nga nagsilbing usa sa mga mayor sa pangkat sa maong pasilidad.
Maka-dispose og pito ka kilo sa shabu matag semana ug nag operate sa ilegal nga drugas sa tibuok Negros Oriental ug Metro Cebu.
Duna nay mga ngalan ang kapulisan sa mga downline ni Iñego nga mao na usab ilang target sa follow up operations.