GRABE ang kahimtang sa drayber sa habal-habal human gipusil sa Zone 5, Purok Bombay, Barangay Canduman, Siyudad sa Mandaue, alas 8:50 Martes sa buntag, Hunyo 24, 2025.
Ang biktima nailhan lang nga si Carl, hingkod ang panuigon ug residente sa Barangay Canduman.
Giobserbahan ang iyang kahimtang sa Eversley Childs Sanitarium and General Hospital human siya pusila.
Matod ni Mercy Villaro, tigpamaba sa Mandaue City Police Office (MCPO), gisakay ni Carl ang usa ka wala mailhing pasahero ug pag-abot sa Purok Bombay gipusil siya dapit sa liog.
Dali nga gidala si Carl sa tambalanan ug gipaubos siya sa emergency surgery.
Ang namusil wala pa mailhi nga daling nisibat.
Gisusi sa mga imbestigador sa kapulisan ang lainlaing posibilidad, lakip ang personal nga panagbangi, o tinuyo nga pag-atake.
Ang pamilya sa biktima mopasaka og kaso batok sa responsabli sa Article 248 sa Revised Penal Code, “Frustrated Murder.”
Ang MCPO nagtukod og dedicated hotline alang sa bisan kinsa nga adunay impormasyon kalabot ning ma-ong kaso. / Trixcy Shien M. Cobarde, Benedicto College intern