Naangol ang usa ka drayber sa habalhabal human gipusil sa makadaghang higayon sa riding in tandem sa Sitio Camansi, Barangay Inayagan, dakbayan sa Naga, alas 8:00 sa gabii, Dominggo, Agusto 18, 2024.
Ang biktima sa mga sakay nga si Aproniano Pansit Tapdasan Jr.,35, dunay kapuyo, ug taga Purok Balisong 1A, Brgy. Inayagan, Naga, nakaangkon og unom ka mga samad pinusilan sa nagkadaiyang bahin sa lawas.
Gidali sa pagdala sa Minglanilla District Hospital samtang, daling nisibat ang wala pa mailhi nga duha ka lalaki nga nagsakay sa itom nga NMax motorcycle.
Dugang nasayran sa kapulisan nga ang bikitma usa ka ex-convict sa kasong kasong illegal drugs.
Sa dugang pakisusi sa Superbalita Cebu base sa pasiunang imbestigasyon sa kapulisan sa Naga Sugbo ubos sa kamandoan sa ilang hepe nga si P/Lt. Col. William Homoc nga ang biktima nag maniho sa iyang motorsiklo tadlas sa maong dapit .
Sa kalit lang gibabagan ang biktima sa nagmotorsiklo nga duha ka wala mailhing lalaki ug namatikdan sa mga saksi nga adunay hamubong panag-istoryahanay sa wala pa gipusil ang biktima sa nag-angkas sa motorsiklo.
Atol ning pagsuwat, nagpadayon pa ang imbestigasyon kun unsay motibo sa maong pagpamusil ug pag-ila sa mga responsable niini.
Ang biktima nakagawas sa prisohan sa miaging tuig 2021 gumikan kay nadakpan sa pagpamaligya og shabu. / DVG,GPL