Wala malipay si Indiana Pacers star Tyrese Haliburton sa gibuhat sa iyang amahan nga nikumpronta kang two-time MVP Giannis Antetokounmpo.
Nahitabo kini human gitagak sa Indiana Pacers ang Milwaukee Bucks, 4-1, sa ilang best-of-seven matchup sa National Basketball Association (NBA) first-round series.
Ang layup ni Haliburton sa 1.3 segundos nga nabilin sa duwa maoy nakahatag og 119-118 nga kadaogan sa Pacers.
“I had no idea it happened until I got back to the locker room and they showed me the video of my pops,” pulong niini.
Matod ni Antetokounmpo nga ganahan siya kang Haliburton apan wala siya makauyon sa gibuhat sa amahan niini nga ni-trashtalk kaniya sa hinapos nga bahin sa duwa.
“I feel like that’s very, very disrespectful,” dugang ni Antetokounmpo nga nitapos sa duwa nga dunay 30 puntos, 20 rebounds ug 13 assists.
Ang Pacers moharong sa East No. 1 seed Cleveland Cavaliers sa Eastern Conference semifinals. / RSC