Litsunero nga giingong naboang sa Swertres ang gipadakop sa iyang amo niadtong ala 1:20 sa kadlawon, Miyerkules, Agusto 21, 2024.
Ang dinakpan naila nga si Peter Luyas, 25, adunay kapuyo nga taga lungsod sa Argao, Cebu ug kasamtangan nga nagpuyo sa Barangay Pardo, Dakbayan sa Sugbo.
Si Luyas gipadakop sa tag-iya sa litsonan nga si Paul Cedric Gabuya, 31, minyo, tag-iya sa Chanocks Litson Manok.
Reklamo ni Gabuya nga ang P25,000 nga halin sa tindahan niadtong Martes, Agusto 20, 2024 ang wa i-remit ni Luyas kinsa nagsilbing tigluto ug cashier sa iyang negosyo nga litsonan.
Nasuta nga gipusta ni Luyas sa numbers game nga Swertres ang maong kuwarta sa pamasin nga modoble ang kantidad pinaagi sa iyang gi-maintain nga numero.
Si Gabuya nagpakuyog og mga sakop sa Barangay Public Safety Officers (BPSO) sa Inayawan ug gisikop si Luyas pinaagi sa citizen’s arrest.
Saysay ni Luyas sa dihang nahinabi sa Superbalita Cebu nga tuyo unta niya nga makapadala og kuwarta sa Negros diin nagpuyo ang iyang live-in alang sa pagpabunyag sa ilang anak nga walo ka buwan.
Sa pamasin nga modoble ang kuwarta nga iyang gipusta sa Swertres human nga aduna siyay mga number combination nga gi-maintain gikan sa iyang gi-follow nga vlogger sa social media nga maghatagan niya og numero.
Sumala pa nga katulo na kahigayon nga iyang nagamit ang halin sa litsonan apan iya ra sab nga nataplan kay nakadaog siya.
Nangayo og pasaylo si Luyas ngadto sa iyang amo diin siya nagpuyo apan desido si Gabuya nga mosang-at og reklamong qualified theft aron sa pagpatagam kaniya sa iyang gihimo. / GPL