Dul-an sa 3,000 ka mga polis ang gipangsilotan tungod sa nagkalainlaing mga kalapasan sa nagpadayong internal cleansing sa Philippine National Police (PNP) sa 2024.
Sa usa ka pamahayag niadtong Dominggo, Enero 26, 2025, ang hepe sa PNP nga si General Rommel Marbil nibutyag nga gikan sa Enero hangtod Disyembre 2024, 5,457 ka mga polis ang gireklamo og administratiba ug 3,751 ang gipasakaan og mga kaso.
Sa mga gipasakaan og kaso, 2,765 ang nasilotan, samtang 2,691 ang giabswelto.
Sa mga gisilotan, 903 ang gitangtang sa serbisyo, 1,112 ang gisuspenso, 108 ang gi-demote, 103 ang wa kadawat sa ilang suweldo, 423 ang gi-reprimand, 82 ang gi-restrict, ug 34 ang gikuhaan sa ilang mga pribilihiyo.
Lakip sa gitaktak nga mga polis mao ang lima ka mga lieutenant colonel, unom ka mga major, 12 ka mga kapitan, ug lima ka mga lieutenant.
Ang mga gisuspenso naglakip sa usa ka colonel, 19 ka mga lieutenant colonel, 29 ka mga major, 30 ka mga kapitan, ug 22 ka mga lieutenant.
"These figures demonstrate the unstinting commitment of the PNP leadership to cleanse its ranks of bad eggs while strictly adhering to due process. Our efforts reflect the PNP's resolve to ensure accountability and maintain the trust of the Filipino people," matod ni Marbil.
Sayo niini, gimando ni Marbil nga ipaubos sa restrictive custody ang kapin sa 20 ka mga polis tungod sa ilang kalambigitan sa iregularidad sa multi-billion nga drug bust sa Manila sa uwahing bahin sa 2022.
Sa 30 ka mga polis nga gipasanginlan nga nalambigit sa pagsakmit sa P6.7 billion nga kantidad sa shabu sa Tondo, duha ang nagretiro, tulo ang nag - optional retirement, usa ang ni-resign sa serbisyo, ug duha ang gitaktak.
Sila gipasakaan og kaso sa pagtanom og ebidensya, paglangan ug pagka way kasayuran sa pagpasaka og kaso sa droga.
Matod ni Marbil, ang internal disciplinary mechanism sa organisasyon, mahinungdanon aron magpabilin ang integridad ug accountability sa matag usa.
Ang internal disciplinary mechanism sa PNP nagsagop sa usa ka holistic, three-point approach sama sa Preventive Approach nga nagpunting sa proactive measures nga gidisenyo aron mapugngan ang misconduct sa dili pa kini mahitabo; Punitive Approach nga gitawag nga “iron hand” sa kapulisan nga nagsiguro nga ang mga nakasala nga mga pulis manubag pinaagi sa pagpahamtang og tukma nga silot; ug ang Restorative Approach, o ang “soft hand,” nga nagtumong sa pag-rehabilitate sa mga gisilotang mga pulis samtang gibalik ang moral ug dignidad sa mga gipaka way sala nga mga opisyal pinaagi sa mga programa sa moral recovery, seminar, ug reintegration activities.
Ang PNP nagpatuman usab og mga lakang aron mapaspasan ang kasulbaran sa mga kaso, lakip ang Zero-Backlog Program, nga nagsunod sa 110-day resolution timeframe nga gilatid sa Napolcom Memorandum Circular 2016-002.
Sa 2024, 1,663 ka mga polis ang gipaubos sa mga seminar bahin sa mga polisiya sa disiplina nga nagpalig-on sa ilang kapasidad. /TPM/SunStar Philippines