GISALIKWAY sa International Criminal Court (ICC) ang hangyo sa kampo ni kanhi Presidente Rodrigo Duterte nga i-disqualify ang duha ka huwes alang sa nagpadayong kaso batok kaniya nga crime against humanity, gumikan sa giingong dili neutral.
Sa giluwatan nga desisyon nga may petsang Hulyo 3, 2025, giluwatan sa plenaryo sa mga huwes nga wala’y igong basihan ang pagduda nga impartial sila si Judge Reine Adélaïde Sophie Alapini-Gansou ug Judge María del Socorro Flores Liera sa kasamtangang kaso.
Apan nipasalig ang plenaryo nga ang duha ka huwes nituman sa ilang katungdanan ubos sa Statute sa ICC.
“The plenary of judges, acting unanimously, considers that no actual nor reasonable apprehension of bias arises in respect of Judges Alapini-Gansou and Flores. The plenary of judges considers that the judges acted, at all times, in accordance with the judicial duties assigned to them under the Statute,” natala sa maong order.
Ang kampo ni Duterte nisang-at sa maong hangyo tungod sa ilang pagtuo nga dili neutral ang duha ka huwes, ila-bi na nga nakapamahayag na sila og desisyon sa susamang isyu sa sama sa kahimtang sa maong kaso.
Rason sa kampo ni Duterte nga aduna nay baruganan ang naasoy nga mga huwes labot sa kaso ug dili angay motimbang sa isyu sa hurisdiksyon.
Si Duterte kasamtangang gitanggong ICC facility sa nasod sa Netherlands samtang nagpa-dayon ang imbestigasyon sa pasangil nga crimes against humanity sa gipatuman nga gubat batok sa ilegal nga drugas atol sa iyang administrasyon. / TPM / SunStar Philippines