Parehong adunay bag-ong teams ang Fil-Am players nga sila si Jordan Heading ug Mikey Williams sa dili pa mahuman ang Philippine Basketball Association Season (PBA) Season 49.
Kini human pormal nga gianunsyo sa PBA nga giaprubahan na niini sa Lunes, Hunyo 2, 2025, ang one-on-one trade nga nagpabalhin ni Heading ngadto sa TNT Tropang Giga ug naghatod ni Williams ngadto sa Converge FiberXers.
Hinuon, wala pa masayri kon kanus-a moduwa og sugod sila si Williams ug Heading sa ilang tagsatagsa ka bag-ong team.
Si Williams kasamtangang naa pa sa US ug wala pa siya nakaduwa pagbalik sa liga gikan niadtong 2023 Governors’ Cup Finals tali sa Tropang Giga ug Brgy. Ginebra Gin Kings.
Niadtong higayuna, natabangan ni Williams ang Tropang Giga nga makuha ang titulo ug siya maoy napiling MVP.
Sa iyang bahin, si Heading katapusang niduwa sa playoffs sa niaging Commissioner’s Cup apan wala pa siya nakabalik pagduwa tungod sa angol nga nasinati niini. / ESL