Nisaad si Lapu-Lapu City mayor-elect Cynthia “Cindi” King-Chan nga paluyohan ang mga proyekto sa imprastraktura nga gipasiugdahan sa iyang bana, si incumbent Mayor Junard “Ahong” Chan, sa iyang paglingkod sa katungdanan.
Si Chan sa usa ka pahayag niadtong Martes, Mayo 13, 2025, niingon nga iyang palig-unon usab ang healthcare, sektor sa edukasyon ug industriya sa turismo sa siyudad sa iyang paglingkod sa katungdanan sa Hunyo.
“I stand ready to lead with integrity, compassion, and a clear vision: We will continue what we have started—building world-class infrastructure, strengthening our healthcare and education systems and uplifting our tourism industry,” matod ni Chan.
“Thank you for your trust, your faith and your overwhelming support. Your voices have been heard loud and clear. You have chosen continuity with change, progress with heart, and leadership that listens, acts, and serves,” dugang niya.
Atol sa administrasyon sa iyang bana, ang mosunod nga dagkong mga proyekto nga nasugdan ug naghulat nga mahuman mao ang 12 kilometros nga Lapu-Lapu Expressway, ang Fourth Bridge, socialized housing sa Barangay Canjulao ug Calawisan, bag-ong Lapu-Lapu City Hall building, coastal road, drainage projects, ug road expansions.
Sa eleksyon sa pagka mayor nga gipahigayon niadtong Lunes, Mayo 12, si Chan nakakuha og 142,058 ka boto ug nilabaw kang ex-mayor Paz Radaza ug independent candidate Cristine Takahashi.
Kini maoy magtimaan sa unang termino ni Chan isip mayor human nidagan sa pagka kongresista niadtong 2022.
Ang iyang Team Kaabag slate nakaangkon sab og laing 15-0 nga landslide nga kadaugan diin 11 ka incumbent councilors ug kanhi Canjulao Barangay Captain Rufo Bering ang nakadaog sa ilang tagsatagsa ka mga lumba.
Ang mosunod nga mga indibiduwal, giranggo sa gidaghanon sa mga boto nga ilang nadawat, maoy magsilbing mga konsehal: Marciano “Jun” Alforque, Annabeth Cuizon, Susan Baring, Celestino “Tino” Aying, Jan Vincent “Janvi” Dela Serna, Efren Herrera, Ariane Yap, Bering, Climaco “Montor” Tatoy Jr., Jeorgen Eyas-Book, Joseph Pangatungan, ug Emilio “Dok” Galaroza Jr. / DPC