ANG desisyon ni Cebu Governor Pamela Baricuatro nga ibalhin ang pundo nga gigahin alang sa mga kalihukan sa Pasigarbo sa Sugbo ug Suroy Suroy Sugbo ngadto sa healthcare services nagpakita nga mas gihatagan og dakong gibug-aton sa administrasyon ni Baricuatro ang panginahanglan sa katawhan nga mao ang panglawas.
Ang maong lakang dili lang usa ka estratehiya sa budgetary realignment, kondili usa ka palisiya nga nagtan-aw sa panginahanglan, prayoridad, ug katungod sa serbisyo publiko.
Ang Pasigarbo ug Suroy Suroy sulod sa pipila ka tuig, nahimong simbolo sa kultura ug promosyon sa turismo sa Sugbo. Kini usa ka ligdong nga paningkamot sa pagpataas sa lokal nga ekonomiya, sa pagpailaila sa mga lungsod, ug sa pagpasigarbo sa atong kultura.
Apan sa kahimtang karon diin ang sistema sa panglawas sa probinsiya nagkinahanglan og dugang nga suporta, kinahanglan og lider nga masayod kon kanus-a hatagan og importansiya ang kalihukan sa hudyaka human nga gipadaplin ni Baricuatro aron hatagan og prayoridad ang nag-unang panginahanglan sa mga Sugboanon.
Gibutyag ni Baricuatro nga ang maong lakang usa ka reprogramming—dili redesign. Ang pagbalhin sa pundo paingon sa panglawas nagpasabot og liderato nga sensitive sa reyalidad nga daghang mga district ug provincial hospitals ang kuwang og pasilidad, tambal, ug medical personnel.
Ang tinuod nga turismo magmalungtaron lamang kon ang katawhan himsog, ug ang ekonomiya molambo kon ang panginahanglan sa batakang serbisyo matubag.
Ang panglawas usa ka katungod, dili usa ka opsiyon. Kini nga prinsipyo adunay moral ug political nga katakos sa usa ka gobernador nga andam mopili og mga desisyon, bisan pa sa posibilidad nga kini makapahugno sa suporta sa sektor sa turismo o pipila ka lokal nga opisyales nga adunay personal nga interes sa maong mga kalihukan.
Sa tinuod lang, ang Pasigarbo ug Suroy Suroy ipadayon gihapon karong tuiga tungod kay giaprobahan na ang pundo ug gisuportahan kini sa balaudnon. Apan ang anunsyo nga ipadangat sa Provincial Board ang pag-usab o pagrepaso sa ordinansa nga nagpalig-on sa maong mga programa nagpakita sa kaugmaon nga aduna’y intensyon sa reforma, ug usa kini ka timaan nga ang baruganan sa liderato base sa prinsipyo, dili sa populismo.
Kini nga isyu dili lang bahin sa pag-redirect sa budget apan nagrepresentar sa klase sa liderato nga gikinahanglan sa Sugbo: ang lider nga mobati sa kahimtang sa iyang katawhan nga andam mobalibad sa mga paborito apan mamahimong makatabang sa mas daghang katawhan.
Kini ang klase sa pagpangagamhanan nga mobati sa tinuod nga pulso sa mga ordinaryong Sugboanon—mga inahan nga nagpa-check-up sa district hospital, mga bata nga nagkinahanglan og bakuna, mga amahan nga nagapaningkamot sa tambal sa ilang sakit.
Sa katapusan, ang pagsabot nga ang kalambuan dili sukdon sa katahom sa parada, kondi sa kalidad sa kinabuhi sa katawhan, usa ka pamatuod nga ang Bag-ong Sugbo nga gisugdan ni Governor Baricuatro usa ka administrasyong may baruganan, may tumong, ug may kasingkasing alang sa katawhan ug ang tanang Sugboanon angay mosuporta niini.