Nisaad og transparent ug progresibo nga administrasyon, ang kagamhanan sa Dakbayan sa Lapu-Lapu ubos sa pagpangulo sa Mayor-elect Ma. Cynthia “Cindi” King-Chan ug Congressman-elect Junard “Ahong” Chan.
Kini maoy ilang panaad sa ilang pormal nga panumpa sa katungdanan sa Sabado sa hapon, Hunyo 28, 2025, sa di pa ang transition of power.
Si Lapu-Lapu City Regional Trial Court Branch 27 Executive Judge Nelson Leyco maoy nipapanumpa sa mga opisyal.
Nagsugod ang kalihukan sa usa ka santos nga misa, ug kapin sa 5,000 ka tawo gikan sa nagkalainlaing sektor sama urban poor, mga health worker sa barangay, ug mga solo parent ang misaksi sa pormal nga seremonyas.
Si Cynthia Chan nga maoy bag-ong mayor nisaad nga iyang palambuon ang serbisyo sa panglawas ug ang kapasidad sa City District Hospital.
Palambuon sab niya ang sektor sa edukasyon, ang kalimpyo sa merkado publiko sa Barangay Poblacion, ug usa ka bag-ong City Hall nga mahimong inclusive ug mas accessible sa mga edaran ug persons with disabilities.
“As your Representative, I brought your voices to the halls of national leadership. Now, as your Mayor, I bring the national back to the local—closer to the people who matter most: you,” matod ni Cynthia Chan.
“My fellow Oponganons, I do not promise perfection, but I promise action. I do not promise ease, but I promise service. I will work not just with hands and mind—but with soul,” iyang gidugang.
Si Junard Chan sa iyang pakigpulong nipamatuod pag-usab nga ang administrasyon sa Chan magpabilin nga komitido sa maayong pagdumala, transparency, ug tinuod nga serbisyo publiko.
“Today marks not just a transition of leadership, but a continuation of a vision – a vision of progress, unity, and genuine public service for our beloved Lapu-Lapu City,” matod ni Junard Chan.
Si Incumbent City Vice Mayor Celedonio Sitoy uban sa iyang 12 ka konsehal nanumpa usab sa ilang katungdanan.
Ang mga konsehal nga nanumpa mao sila si Marciano “Jun” Alforque, Annabeth Cuizon, Susan Baring, Celestino “Tino” Aying, Jan Vincent “Janvi” Dela Serna, Efren Herrera, Ariane Yap, Climaco “Montor” Tatoy Jr., Jeorgen Eyas-Book, Joseph Pangatungan, Emilio “Dok” Galaroza Jr.
Ang bag-ong miyembro sa konseho mao si kanhi Kapitan sa Canjulao nga si Rufo Bering. / DPC