Daghan ang wala makatuo sa kalit nga pagpanaw sa Cebuana beauty queen, talent manager, ug negusyante nga si Aida Patana kinsa namatay sa Martes, Hulyo 29, 2025.
Si Aida, 51, gikumpirmar nga nipanaw na pinaagi sa Facebook post sa iyang mga anak.
"With heavy hearts, we share that our beloved mom has peacefully joined our Creator.
“This is an incredibly difficult time for our family, and we kindly ask for your understanding and privacy as we grieve and process this deep loss," sa post ni Stephanie Abilla.
Ang maong susamang pamahayag gi-post sab sa Cebuana Twins nga sila si Shiela ug Shiena Patana lakip ang hulagway sa duha kauban ilang inahan.
Matod sa source sa Superbalita Cebu nga heart attack ang gikamatyan ni Aida nga anaa sa kaulohan nakabsan sa iyang kinabuhi.
Daw busy ang maong promoter sa umaabot nga concert sa content creator ug performer nga si Elias J. TV uban ang Cebuana Twins sa Sugbo karong Agusto 23, 2025.
Apan sa pagkutlo ning balita, wala pa nikumpirmar ang pamilya kabahin niini.
Si Aida niapil na sa nagkadaiyang beauty pageants dili lang sa Pinas apan lakip na sa abroad.
Siya mao ang nirepresentar sa Visayas sa Mrs. Philippines World 2019. Nasungkit sab niini ang korona isip Mrs. Tourism Ambassador Philippines niadtong 2022.
Gikoronahan sab kini isip Mrs. Tourism Ambassador Universe 2022 sa Malaysia.
Si Aida moa ang tag-iya sa MTalents Events and Promotions, usa ka talent agency alang sa mga event ug production.
Sayo ning buwan sa Hulyo dihang nagsaulog si Aida human niabot og 1 million ang followers niini sa Facebook. /HBL