NILAHOS ang payloader nga giingong nawad-an og brake ug nitugpa ngadto sa atop sa usa ka balay sa dihang nidulhog sa may Sityo Roosevelt, Barangay Busay, Dakbayan sa Sugbo niadtong alas 5:00 pasado sayo sa buntag, Martes, Hulyo 1, 2025.
Ang drayber sa maong heavy equipment giila nga si Tony Lumacad, 45. Siya miingon nga nawad-an og preno ang iyang gimaneho nga payloader hinungdan nga nalahos ug nasangit sa atop sa balay nga gipanag-iya og dentista.
Nasuta nga nagsubay ang maong payloader sa dulhogon nga bahin ug atol nga dangog ang kalsada tungod sa nasinating uwan sa nakalabay nga adlaw.
Sa inisyal nga pakisusi, ang payloader naggikan sa Temple of Leah usa ka inila nga tourist attraction sa Barangay Busay ug padung unta mohakot og yuta ngadto sa ubos nga bahin sanglit adunay gitrabaho sa sulod nga bahin sa maong tourist destination.
Nasayran nga ang bahin sa atop nga naguba habig sa kwarto sa 12 anyos nga anak sa dentista nga natulog niadtong higayona.
Tug-an sa tag-iya sa balay nga nakugang nalang sila sa dihang nadungog ang kusog nga lugapak ug natay-og ang balay sa pagtuo nga adunay linog.
Sa dihang gisusi ang dapit diin ang atop nawalis nangatagak ang mga tipika sa nabuak nga semento ngadto sa kuwarto ug maayo nalang kay luwas ra ang bata nga dali sab nga nigawas sa kuwarto.
Gipaabot ang tag-iya sa balay nga makahatag og opisyal nga assessment sa kinatibuk-ang danyos sa atop nga naguba ug nipasalig ang nagdumala sa establisemento nga moabaga sa pagpa-ayo sa nahimong damage. / JDG