Napili nga Best Senior Police Commission Officer (PCO) for Operation ang hepe sa Cebu City Police Office (CCPO) nga si Police Colonel Enrico Figueroa atol sa kasaulogan sa ika-124th Police Service Anniversary nga gipahigayon sa Kampo Crame nga dunay tema nga “Pulisya, Bantayog ng Bayang Matatag,"
Ang pasidungog gitunol mismo ni President Ferdinand "Bongbong" Marcos Jr.
Matod ni Police Lieutenant Colonel Maria Theresa Macatangay ang deputy city director for operation sa CCPO nga nitambong sab sa maong kalihukan nga giila sa PNP National Headquarters ang ilang anti-criminality strategy.
Nag-una ang CCPO sa tanang City Police Office sa Pilipinas sa operational accomplishments ug inisyatiba aron pagbatok sa kriminalidad ug na-highlight ang Oplan Bulabog nga niresulta sa pag-ubos sa krimen ngadto sa 32.71% sa overall crime rate ug ang 100% nga crime clearance efficiency sa unang katunga sa 2025. Usa sa mga malampuson nga gihimong innovative strategies mao ang pagmugna sa Criminal Investigation and Detection Unit (CIDU).
Nipasabot si Macatangay nga ang naangkon nga pasidungog ni Figueroa kadaugan sa kapulisan ug katawhan sa Dakbayan sa Sugbo. / AYB