NILUWAT og kamanduan ang director sa kapulisan sa Central Visayas, Police Brigadier Redrico Maranan sa hepe sa Danao City Police Station nga dakpon ang tanang tiggama og ilegal nga armas sa maong siyudad.
Giluwatan ang kamanduan human niadtong pagkasikop sa tulo ka sakop sa dakong sindikato sa pagpamaligya og paltik nga armas sa maong siyudad niadtong Biyernes, Marso 21, 2025.
Matod ni Maranan nga gihatagan lang niya og usa ka buwan ang hepe nga madakpan ang mga tiggama ug tigbaligya sa mga ilegal nga armas.
Kon dili masumpo sulod sa 30 ka adlaw nga gitagal ug kon dunay makuha ang laing unit sa kapulisan nga mga armas, mahimong mag-atubang ang hepe og kaso isip command responsibility ug pahulipan sa katungdanan.
“Base on policy pagka hindi niya nahuli yung mga gumagawa diyan sa lugar na yan at may other units, other than Danao City Police Station ang nakahuli diyan, eh meron siyang tinatawag na command responsibility and 'pag ikaw may violations command responsibility then you will be administratively relieved,” matod ni Maranan.
Sa nakuha nga impormasyon ni Maranan, ang ilang nadakpan usa ka dakong sindikato sa pagbaligya og mga paltik nga armas ug naabot kini sa laing rehiyon sa Pilipinas.
Isakay kini og barko pagawas sa Sugbo hinungdan gisusi kon unsa kadako ang grupo sa sindikato.
Ang mga tiggama og armas sa Danao giingong makahimo og mga submachine pistol sama sa KG9, nindot nga klase sa kalibre 45.
Nabantayan sa heneral nga matag dunay mga armas nga masakmit gikan sa mga armadong tawo, ilang ibutyag nga sa Danao nila kini napalit sa barato nga kantidad.
Samtang nagpadayon ang gihimong manhunt sa Police Regional Office 7 sa usa ka elected official nga nakaikyas sa gihimong operation.
Matod ni Maranan nga ang maong kanhi elected official usa na kini ka barangay kagawad sa usa ka lugar sa Dakbayan sa Danao nga ang negosyo mao ang paghimo sa paltik nga armas.
Giapil na hinuon siya sa pagpasaka og kasong kalapasan sa Republic Act 10591 (Comprehensive Firearms and Ammunition Regulation Act) in relation sa Omnibus Election Code o Comelec Gun Ban. / AYB