Girelibuhan sa iyang puwesto ang hepe sa Lapu-Lapu City Police Station 2 human sa pagpangronda sa giingong scam hub nga naglihok sulod sa usa ka subdivision sa Barangay Mactan.
Si Lapu-Lapu City Police Office (LCPO) Director Lt. Col. Dyan Agustin nibutyag sa mga tigbalita niadtong Huwebes, Hunyo 12, 2025, nga ang desisyon nagtumong sa pagsiguro sa patas ug walay pagpihig nga imbestigasyon sa kaso.
“The relief is to clarify the issues, to find out what a certain police officer may be lacking, and for us to address it just in case there are others being monitored or we happen to monitor the same activities,” matod ni Agustin.
Bisan og walay pormal nga kaso nga ipasaka batok sa hepe sa station 2 , kini gihimo human sa nagpadayong pag-monitor sa mga Philippine Offshore Gaming Operators (POGOs) ubos sa hurisdiksyon sa kapulisan.
Nagpaabot ang kapulisan sa resulta sa imbistigasyon sa National Bureau of Investigation (NBI) 7, ilabi sa mga datos nga nakuha gikan sa mga kompyuter nga nasakmit, aron masayran kon ang operasyon usa ba ka POGO-like setup o usa ka scam hub.
“There is no negligence. What we need is to find out if there were any lapses or shortcomings, whether on our part, the commander’s, or if I failed to give a proper reminder,” matod ni Agustin.
Ang pagpangronda niadtong Hunyo 4 sa usa ka pribadong subdivision sa Mactan, nisangpot sa pagkasikop sa 31 ka indibidwal, lakip na ang duha ka Taiwanese nationals, nga giingong nalambigit sa dako nga online scamming scheme nga nag-target sa mga dating website ug applications.
Ang hiniusa nga operasyon sa LCPO ug NBI 7 nakadiskubre og kapin sa 20 ka Pilipinong trabahante nga giingong nagpahigayon og mga scam ubos sa pagdumala sa duha ka Taiwanese nga lalaki, nagpangedaron og 31 ug 41.
Ang mga nadakpan nakalapas sa Republic Act 10175, o ang Cybercrime Prevention Act of 2012, ilabi na may kalabutan sa computer-related fraud.
Giklaro ni Agustin nga bisan og temporaryong gi-relieve ang hepe sa Mactan Police Station, nagpabilin siya nga gi-assign sa LCPO headquarters.
Ibalik ang opisyal sa higayon nga ma-cleared siya human sa imbestigasyon.
Niadtong Agusto 31, 2024, nagkalainlaing law enforcement agency ang nironda sa giingong POGO hub sa Tourist Garden Hotel sa Barangay Agus, Lapu-Lapu City.
Kadto nga operasyon mao ang labing una nga nadiskubrehan sa Visayas, sukad sa POGO ban sa tibuok nasod nga gipahibalo ni Presidente Ferdinand Marcos Jr.
Ang operasyon nisangpot sa pagkasikop sa kapin sa 160 ka langyaw nga kasagaran gikan sa China, Indonesia, Myanmar, ug Malaysia, nga gikatahong gipugos sa pagbuhat og online scams sama sa love ug investment fraud.
Gipasirhan sa kagamhanan sa Dakbayan sa Lapu-Lapu ang hotel ug giumol ang task force ubos sa Executive Order 2024-40 ni outgoing Mayor Junard “Ahong” Chan aron sumpuon ang nagpahigayon og ilegal nga kalihukan. / DPC