Ang tirador nga Tyler Herro mipakatap og 30 puntos para pangulohan ang Miami Heat ngadto sa 118-95 nga daog batok sa short-handed Philadelphia 76ers, Marso 30 (PH time) didto sa Philadelphia.
Midugang si Alec Burks og 20 puntos para Heat, kinsa gahupot karon sa final spot sa Eastern Conference para sa play-in tournament. Midaog na og upat ka sunodsunod ang Miami human nila maputol ang 10-game losing streak.
Napasulod ni Herro ang lima sa 20 ka 3-pointers sa Heat.
Si Jared Butler dunay 19 puntos alang sa Philadelphia, kinsa na-eliminated na sa playoff contention sa ilang ikapito nga sunodsunod nga pilde.
Gidimalas ang 76ers karon nga season tungod sa injury. Si Joel Embiid ug Paul George pulos out for the season.
Lakip pud sa wa moduwa si 76ers si Tyrese Maxey.
Ang Heat nagduwa pud nga wala ang ilang uban nga pambato nga sila Andrew Wiggins (right hamstring) ug Duncan Robinson (back). / RSC