Wala pa nasayod si Hidilyn Diaz kon unsa’y lakang nga iyang himuon sa umaabot human siya napakyas pag-qualify sa Paris Olympics.
Ning bag-uhay lang, si Diaz igo lang nakaalsa og 222 kilograms sa women’s 59kg division sa International Weightlifting Federation (IWF) World Cup sa Phuket Thailand, dili kini paigo aron mahatod siya sa Paris Games. Nakahilak si Diaz human sa iyang performance.
Sa usa ka artikulo sa IWF.sport, nagkanayon si Diaz nga dili pa siya gustong moundang apan iyang giangkon nga kinahanglan una niyang hunahunaon og maayo kon unsa ang angay niyang hatagan og prayoridad sa iyang kinabuhi.
Si Diaz, kinsa maoy naghatag sa bugtong Olympic gold medal sa Pilipinas niadtong 2021 sa Tokyo, Japan, naminyo sa dugay na niyang uyab ug coach nga si Julius Naranjo niadtong 2022. / ESL