GIILANG high value target sa Dakbayan sa Lapu-Lapu ang nadakpan sa buy-bust nga gipahigayon sa Philippine Drug Enforcement Agency (PDEA) Lapu-Lapu City, uban sa Lapu-Lapu City Police Office sa alas 12:30 sa kaadlawon, Lunes, Agusto 11, 2025, sa Sitio Pak-pakan, Barangay Basak sa maong dakbayan.
Ang nasikop giila ni PDEA 7 Regional Director Joel Plaza nga si alyas Rits, 36-anyos, private driver nga taga Barangay Ermita, Siyudad sa Sugbo.
Nasakmit gikan kaniya ang tulo ka putos sa gituohang shabu nga motimbang sa 50 gramos nga dunay kantidad nga P340,000.
Lakip sa nasakmit ang usa ka cellular phone ug ubang mga ebidensya nga gikustodiya na sa PDEA 7. / AYB
