Human sa sunod-sunod nga sunog sa Barangay Basak ug Canjulao niadtong Biyernes sa buntag, Mayo 30, 2025, nag-andam ang kagamhanan sa Dakbayan sa Lapu-Lapu og pinansyal nga tabang alang sa kapin 200 ka pamilya nga nawad-an og pinuy-anan.
Wala hinuoy natalang namatay sa duha ka sunog, apan usa ka 40-anyos nga lalaki ang naangol sa sunog sa Canjulao.
Gibutyag ni Catherine Ladaga, pangulo sa City Social Welfare and Development Office (CSWDO), sa SunStar Cebu nga giproseso na ang cash aid nga ipang-apod-apod sa matag apektadong pamilya.
Matod ni Ladaga nga ang mga nag-abang makadawat og tag P5 mil, ang mga tag-iya sa panimalay nga partially damaged makadawat og P10 mil, samtang ang kadtong hingpit nga nasunogan og balay makadawat og P30 mil.
Dugang pa, ang mga sharer gikan sa hingpit nga naguba nga mga balay makadawat og P8,000 matag usa.
Sa Sabado, Mayo 31, 2025, ang assessment sa kadaot nga gihimo sa CSWDO nagpakita nga 34 ka panimalay nga naglangkob sa 382 ka mga indibidwal gikan sa 194 ka pamilya ang naapektuhan sa Basak.
Sa Canjulao, labing menos 26 ka panimalay nga naglangkob sa 36 ka pamilya ug 181 ka indibidwal ang naapektuhan.
Naghatag na ang mga opisyal sa dakbayan og essential food ug non-food assistance sa mga bakwit, lakip na ang mga masuso ug mga edaran, nga temporaryong mipasilong sa Canjulao Elementary School gymnasium ug sa Basak gymnasium.
Matod ni Ladaga nga gipaabot pa ang meeting sa City Council aron hisgutan ang pag-relocate sa mga apektadong pamilya. / DPC