GIPAKITA sa mga opisyal sa National Police Commission (Napolcom) ug Philippine National Police (PNP) ang ilang simpatiya sa pamilya sa nitaliwan nga si Police Patrolman Mark Ornopia nga namatay tungod sa pagtuman sa katungdanan.
Si Patrolman Ornopia, nga napatay atol sa usa ka operasyon sa Danao City niadtong Hunyo 27, 2025, gihaya sa iyang panimalay sa Purok Nangka, Barangay Ilihan, Tabogon, Cebu.
Si Atty. Rafael Vicente Calinisan, Commissioner, Vice Chairman, ug Executive Officer sa Napolcom, uban ni Police Major General Constancio Chinayog Jr., Hepe sa Directorate for Personnel and Records Management sa Kampo Crame, ug Police Brigadier General Jonas Amparo, Director sa PNP Retirement and Benefits Administration, maoy nangulo sa pagtunol sa Medalya ng Kadakilaan isip usa ka pasidungog sa kaisog ni Ornopia.
Gawas niini, gihatagan usab og pinansyal nga tabang ang iyang pamilya gikan sa Napolcom ug PNP.
Matod ni Police Brigadier General Redrico Maranan, ang hepe sa Police Regional Office (PRO) 7, nga gawas sa gipanghatag nga pasidungog ug pinansyal nga tabang, girekomendar usab ang usa ka Posthumous Promotion alang kang Patrolman Ornopia. Kini nagpasabot nga ang iyang ranggo isaka gikan sa Police Patrolman ngadto sa Police Corporal, usa ka pag-ila sa iyang sakripisyo nga giaprobahan sa Napolcom.
Dugang pa ni Maranan, ang PNP mohatag og pinansyal nga tabang sa pamilya ni Ornopia nga mokabat sa kapin sa P600,000.
Kini nga kantidad, suma ni Maranan, mao pa ang inisyal ug wala pay labot ang mga boluntaryong kontribusyon gikan sa tanang personnel sa kapulisan sa Central Visayas.
“In total ang matatanggap na financial assistance nuong pamilya nuong bayaning police more than P600K yung initial naming computation pag na kompleto na lahat yun ay 600,000 plus ang matatanggap niyang benepisyo maliban yun sa among voluntary contribution pa ng lahat ng police ng Central Visayas, initial palang yun madadagdagan pa yun,” matod ni Maranan.
Ang PNP nisaad usab og suporta sa edukasyon sa anak ni Ornopia pinaagi sa full-time scholarship gikan sa elementarya hangtod sa kolehiyo.
Kini aron dili na mabug-atan ang pamilya sa galastuhon sa pag-eskwela sa bata.
Gitan-aw usab sa PRO-7 ang posibilidad nga ang asawa ni Ornopia mahimong makahulip sa serbisyo sa kapulisan.
Kung di man kini mahimo, gipasalig sa PNP nga mangita sila og paagi aron makahatag og lain nga trabaho sa gobiyerno alang sa asawa. / AYB