Subling nanawagan ang Federation of Cebu Transport Cooperative (FCTC) sa Marcos administration sa hingpit nga pagpatuman sa Public Transport Modernization Program (PTMP) ug i-phase out ang tanang traditional jeepneys sa tibuok nasod aron kahatagan og mas nindot ug hamugaway nga transport system ang mga Filipino nga sumasakay.
Si FCTC Chairperson Ellen Maghanoy niawhag sa nasudnong gobiyerno nga sulbaron ang nagpadayong walay klarong mga polisiya sa transportasyon ug nitataw nga ang kakuwang sa direksyon maoy nakalangay sa paglambo sa modernization program.
Sa usa ka press conference sa Lunes, Marso 24, 2024, si Ellen nagkanayon nga nga ang FCTC kanunay nga nagsuporta sa PTMP sukad kini gilusad niadtong 2018, apan ang gobiyerno napakyas sa paghan-ay sa klaro ug tukma nga mga polisiya kalabot sa programa.
“As stakeholders in the transport sector, we are acutely aware that these constant shifts in direction not only create confusion but also hinder our operations and planning efforts,” matod niya.
Ang kooperatiba nga naghatag og 5,000 ka trabaho ug nagsuporta sa sobra sa 3,000 ka mga miyembro ug sa ilang pamilya, nipasidaan nga ang kakuwang sa hiniusang modernization strategy nakaapekto sa investments, operational decisions, ug long-term sustainability.
Ang FCTC nanawagan sa mga awtoridad nga makiglambigit sa transport cooperatives sa pagtuki sa mga lagda aron masiguro ang kalambuan sa malungtaron nga well-integrated public transport system.
Gitataw ni Maghanoy nga ang modernization kinahanglan nga hiniusang paningkamot tali sa gobiyerno ug transport stakeholders aron masiguro ang hapsay nga transition, mabantayan ang panginabuhi ug magahatag og epektibo, kasaligan ug commuter-friendly services.
“We believe that a collaborative approach, involving input from cooperatives like ours, is critical to developing a sustainable and effective public transport system,” dugang niya. / EHP