Hirit: Alang sa hingpit nga kaayuhan sa tanan

Jillian Jaca

University of Cebu

Taliwala sa kasaba sa kadalanan ug importanteng mga dapit sa kasaysayan sa sentro sa Sugbo, adunay usa ka panagbangi- dili espada ug ta­ming kon dili ang paggamit sa pulong ug gahum.

Ang kontrobersiya sa Cebu Bus Rapid Transit (BRT) nakapukaw ug nakapasilaob sa politikanhong diskurso, nag-away ang inilang mga persona­lidad gikan sa dakbayan sa Sugbo batok niadtong gikan sa probinsya sa Sugbo, nga naghulga di lamang sa pag-uswag, kon dili sa mismong pundasyon sa pagdumala ug pagpreserbar sa kultural nga kabilin.

Sa sentro ning maong kontrobersiya, anaa si Ma­yor Michael Rama nga mati­nud-anong manlalaban sa BRT project ug nanalipod sa interes sa dakbayan sa Sugbo. Ang iyang dili matarug nga pagsalig sa pag-uswag ug ka­lamboan sa siyudad, gidayeg ug gisaway, samtang siya nag­lakip sa diskurso sa politika nga may determinasyon ug malig-on nga pagsalig nga ang problema sa trapiko masulbad.

Sa kaatbang nga bahin, si Gobernador Gwendolyn Garcia mitumaw nga usa ka gamhanang pwersa, nga naggamit sa iyang awtoridad sa pagpahunong sa mga trabahong sibil may kalabutan sa BRT project atubangan sa Kapitolyo sa Probinsiya sa Sugbo. Ang iyang mga kabalaka bahin sa pagpanalipod sa mga heritage site ug pagsunod sa mga legal nga mandato, nagpakita sa usa ka lawom nga pasalig sa pagpreserbar sa adunahan nga kultural nga kabilin sa Sugbo, bisan pa kon kini nagpasabot sa pagsakripisyo sa pag-uswag ug kalamboan.

Nalambigit sa kagubot ang mga lumolupyo sa Sugbo, kinsang inadlaw-adlaw nga kinabuhi nalambigit kaayo sa pulso sa kadalanan ug mga timaan sa dakbayan. Alang nila, ang BRT project nagpasabot dili lang usa ka solusyon sa mga hagit sa trapiko kon dili usa usab ka kahayag sa pagkamalaumon alang sa mas maayong ugma. Bisan pa, taliwala sa mga panaglalis sa politika ug legal nga mga away, ang ilang mga tingog nameligro nga matabonan, gipadaplin na lamang sa kilid mahitungod sa usa ka away sa gahom nga wala nila gipili nga mahimong kabahin.

Samtang nagpadayon ang panagsangka, nagkaanam katin-aw nga ang kapalaran sa proyekto sa BRT nagbitay sa balanse, sulod sa kawalay kasi­gurohan ug panagsumpaki.

Taas ang pusta, nga adunay minilyon ka pesos ug ang kaug­maon sa urban mobility nakataya.

Samtang sila si Mayor Rama ug Gobernador Garcia nag­representar sa managlahing mga panglantaw sa pag-uswag ug pagpreserbar sa kabilin, importante nga ilhon nga ang duha ka tumong importante alang sa malungtarong paglambo sa siyudad.