Giingong hitman sa usa ka drug group sa lalawigan sa Bohol usa sa mga nadakpan sa buy-bust sa Provincial Intelligence Unit sa Bohol Police Provincial Office (BPPO) uban sa Panglao Municipal Police Station, alas 6:30 sa buntag sa Huwebes, Oktubre 19, 2023, sa Purok 1, Barangay Danao , Panglao, Bohol.
Ang mga nadakpan giila sa mga residente sa dapit nga sila si Rejie Toribio Abundo, hingkod, high value individual sa drugas, uban nila ni Christian Manayaga, Bridget Rose Olaivar, Princess Vanna Cutaran, ug duha ka mga ka menor de edad.
Si Abundo giingon nga gun-for-hire. Lakip sa nasakmit sa kapulisan mao ang 55 gramos sa gituohang shabu nga mobalor og P374,000 ug duha ka mga armas nga kalibre 9MM ug KG9 sub machine pistol nga dunay mga bala.
Matod ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin, hepe sa Police Regional Office (PRO 7), nga ang grupo nalambigit na sa mga pagpamusil sa Bohol nga dunay kalambigitan sa ilegal nga drugas.
Usa sa ilang gidudahan nga kon wala pa sila madakpi, posibling magamit kini sa pagpang hulga sa election sa ikatulo nga distrito sa lalawigan sa Bohol.