‘Hitman’ nasikop atol sa buy-bust; ‘miangkon’ sa mga kasong pagpatay

‘Hitman’ nasikop atol sa buy-bust; ‘miangkon’ sa mga kasong pagpatay
■ BUY-BUST: Giila sa kapulisan hitman usa sa duha nga nasikop sa buy-bust sa Sawang Calero, dakbayan sa Sugbo, alas 9:50 sa gabii, Martes, Hunyo 11, 2024. / TAMPO

Giila nga hitman sa drug personalities sa Sawang Calero ug sa mga silingang barangay sa dakbayan sa Sugbo lakip sa iyang kauban, nadakpan sa Sawang Calero Police Station sa Cebu City Police Office atol sa buy-bust, alas 9:50 sa gabii, Martes, Hunyo 11, 2024.

Ang suspek giila nga si alyas Mata, 18, residente sa Sitio Balangakpuna, Barangay Sambag 1, Dakbayan sa Sugbo nga maoy target sa operation.

Nadakpan usab ang iyang kauban nga si alyas Gero, 27, taga Sitio Maharlika, Brgy. Sambag 2, Dakbayan sa Sugbo.

Nakuha gikan kanila ang mga pinutos sa shabu nga mo­timbang og 14.8 gramos nga dunay standard drug price nga P96,424 ug usa ka kalibre .45 nga pistola nga Colt MK IV Series 80 nga nagtangag pa sa bala ug magazine nga dunay sulod nga duha ka extra nga mga bala.

Matod sa usa sa mga police personnel nga nakadakop sa suspek, si Mata giila nga tirador ug daghan na kini’g napatay.

Mitug-an, matod pa, kini sa imbestigasyon nga sa nag-edad pa siya og 14 anyos nakapatay na siya bugti sa suhol nga P25,000 ngadto sa P30,000.

Nagsunodsunod pa kini labi na kadtong dunay mga utangan sa ilegal nga drugas, lakip na ang personal nga atraso mamahimo usab siya mobira.

“Modawat lang kuno siyag P25K. Naa puy P30K. Amo pa ni subayon kon unsa pa to iyang gipangbirahan,” matod sa usa sa mga personnel nga dili magpaila. Ang usa sa giangkon ni alyas Mata ang pagpamusil sa Barangay Calamba diin ang biktima nakalas apan wala pa maklaro kon asa niadto.

Kalapasan sa Section 5 ug 11, Article II sa Republic Act 9165 kun Comprehensive Dangerous Drugs Act of 2002 bahin sa ilegal nga drugas ug Republic Act 10591 kun illegal possession of firearms ipasaka batok niya. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph