‘Hitman’ patay sa pinusilay sa polis

TAMPO SA TALISAY POLICE
‘PINUSILAY’: Gihan-ay sa mga sakop sa Talisay City Police Station ang ilang nakuha nga mga ebidensya gikan kang Albert Padayao, alyas Perot, human kini nila napatay sa giingong engkwentro sa Huwebes sa alas 5 sa hapon, Mayo 23, 2024 nga nagsugod sa Brgy. Candulawan, Dakbayan sa Talisay hangtod sa Cabangcalan Dos, Brgy. Bulacao, Dakbayan sa Sugbo. Gihulagway siya sa kapulisan nga “banggiitan” nga kriminal. Ngano kaha? TAMPO SA TALISAY POLICE

Patay nang niabot sa ospital ang usa ka giingong gikaintapan nga hitman kun gun-for-hire ug giila nga high value target sa kapulisan sa Dakbayan sa Talisay human sa engkwentro tali sa kapulisan sa mga alas 5 sa Huwebes sa hapon, Mayo 23, 2024 sa Purok Camanchili, Brgy. Candulawan.

Nahitabo ang ginukdanay tali sa kapulisan ug sa suspek nga giila nga si Albert Padayao, alyas Perot, taga Brgy. Maghaway, Dakbayan sa Talisay gikan sa Canduwalan hangtod sa Cabangcalan Dos, Brgy. Bulacao, Siyudad sa Sugbo.

Matod ni Police Lt. Col. Epream Paguyod, hepe sa Tali­say City Police Station, nga nilusad og monitoring ang iyang mga personnel sa Drug Enforcement Unit (DEU) subay sa kadaghan sa report nga ilang nadawat nga mibalik na paggara ang ilegal nga drugas sa maong dapit.

Apan sa dihang nakabantay si Padayao sa presensya sa mga polis, namusil kini sa mga otoridad hinungdan nga nahitabo ang engkwentro.

Human niini, nahitabo ang ginukdanay dihang nieskapo si Padayao gikan sa mga polis hinungdan nga sila niabot sa Cabangcalan Dos, Brgy. Bulacao.

Pipila ka mga gutlo ang milabay, ilang nakit-an ang suspek nga nagbuy-od daplin sa sapa nga samaran.

Dali nila kini nga gidala sa Cebu South Medical Center sa Dakbayan sa Talisay sa alas 5:30 sa hapon apan gideklarar sa mga doktor nga patay na pag-abot.

Nakuha sa mga polis gikan sa suspek ang usa ka kalibre .45 nga pistola nga maoy gigamit sa pagpamusil niya sa mga polis.

Lakip sa nakuha ang mga pinakete sa gituohang shabu nga motimbang og 12.35 gramos nga dunay standard drug price nga P83,980.

MGA KASO

Dugang ni Paguyod nga si Padayao nalambigit sa mga kaso sa pagpamusil sa dakbayan sa Talisay.

Niadtong Pebrero 22, 2024 sa alas 10:20 sa buntag, siya ang gitumbok nga nipusil kang Juan Estomago Ordiniza, 63, sa Sitio Cabancalan 2.

Pagka Abril 14, 2024 alas 3 sa kaadlawon, siya usab ang gitudlo sa mga saksi nga nipusil patay sa tinun-an sa grade 12 nga si Jasper Martinez Alegria, 18, sa Sitio Baracks, Brgy. Ina­yagan, Dakbayan sa Naga.

Matod sa imbestigasyon sa Dakbayan sa Naga nga selos ang hinungdan human nga ang kanhi uyab niini niangkas sa motorsiklo sa biktima.

Ang mga kauban ni Perot lakip sa gipasakaan og kaso sa korte ug nagpaabot pa sa warrant of arrest alang sa pagdakop kanila.

Siya nadakpan na kaniadto sa kapulisan sa mga kasong attempted murder, robbery, illegal possession of firearms ug illegal drugs.

Usa ka police official niingon nga siya hitman sa mga durugista kay maoy suguon kon dunay di makabayad sa illegal drugs. / DVG, AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph