Giila sa kapulisan nga hitman sa usa ka drug personality, ang nasikop sa buy-bust operation sa mga sakop sa Labangon Police Station, Sabado sa gabii, Hunyo 8, 2024, sa Sityo Bonbon, Barangay Labangon, dakbayan sa Sugbo.
Ang suspetsado giila nga si Patricio Abarri Nuñez, alyas Patrick, 33, taga Block 2, dan Magsaysay, Barangay Suba, siyudad sa Sugbo.
Nakuhaan si Patrick og mga pinakete nga adunay sud nga gituohang shabu nga motimbang sa 10.65 gramos nga dunay standard drug price nga P72,420.
Lakip sa nakuha sa mga operatiba ang .38 nga kalibre nga pistola nga dunay tulo ka bala niini.
Giingong gawas sa pagkalambigit sa gun-for-hire ni Nuñez giingon mamaligya usab kini’g illegal nga drugas.
Nabilanggo na kini sa Cebu City Jail ug nakagawas niadtong Marso 2024 sa kaso niini sa illegal nga drugas.
Giandam na ang kasong kalapasan sa Sections 5 ug 11, Article II RA 9165 ug Republic Act 10591 kun illegal possession of firearms ang ipasaka nga kaso sa Labangon Police Station karong adlawa. / AYB