Nisugyot ang Department of Health (DOH) nga ideklara ang usa ka nasudnong public health emergency tungod sa kusog nga pagsaka sa gidaghanon sa kaso sa human immunodeficiency virus (HIV) sa tibuok nasod.
Sa usa ka pamahayag, si DOH Secretary Teodoro Herbosa nagkanayon nga ang gidaghanon sa kaso sa HIV sa nasod nisaka og 500 porsiyento nga dunay 57 ka kumpirmadong kaso matag adlaw gikan sa Enero hangtod Marso 2025.
Ang nasod sa pagkakaron adunay kinatibuk-an nga 148,831 ka aktibong kaso sa HIV.
Matod niya nga ang HIV mas dako pa nga problema kaysa mpox (Monkeypox), ug ang Pilipinas adunay pinakadaghan nga bag-ong kaso sa HIV sa Western Pacific Region.
“Five hundred percent increase po tayo ng HIV cases sa mga edad 15 hanggang 25. In fact, ang pinakabatang na-diagnose natin ay batang 12 anyos sa probinsiya ng Palawan,” sumala ni Herbosa.
“So ang malaking problema po natin ay hindi monkeypox kundi ang paglaganap ng HIV…Ang nakakatakot lang napakadaming new cases po sa ating mga kabataan,” siya nidugang.
Si Herbosa nagkanayon nga kon dili mapugngan sa nasod ang dugang pagkatag sa virus, ang gidaghanon sa kaso sa HIV mahimong molapas sa 400,000.
Gipahibalo niya ang panginahanglan nga dugangan ang pag-testing sa HIV ug palig-onon ang mga paningkamot sa pagpugong. / TPM /SunStar Philippines