Taliwala sa panawagan alang sa deklarasyon sa “public health emergency” tungod sa paspas nga pagsaka sa kaso sa Human Immunodeficiency Virus (HIV) sa nasod, gibutyag sa Overseas Workers Welfare Administration (OWWA) niadtong Biyernes, Hunyo 6, 2025, ang ilang plano nga ilakip ang maong sakit sa Pre-Departure Orientation Seminar (PDOS) alang sa mga Overseas Filipino Workers (OFWs).
Sa pamahayag sa OWWA, gipahibalo niini nga padayon ang ilang pagtuki aron mahimong kabahin sa mandatory PDOS ang impormasyon kabahin sa HIV.
“We intend to have a program that will address the need of OFWs amid the surge in HIV cases in the country,” matod pa sa OWWA.
Dugang sa ahensya, “One proposal is to include HIV as a subject matter during PDOS as well as in other OFW educational initiatives of OWWA.”
Laing tanyag ang paghatag og antiretroviral treatment (ART) alang sa mga OFW nga nagpositibo sa HIV.
“We are looking to provide free HIV medicines for OFWs with HIV as part of the expanded medical assistance,” sumala pa sa OWWA.
Kini nga mga sugyot sa OWWA pipila lang ka adlaw human gipanawagan sa Department of Health (DOH) ang deklarasyon sa usa ka “public health emergency” tungod sa HIV.
Base sa datus sa DOH, moabot na sa 10,819 ka kaso sa HIV ang natala nga naglambigit sa mga OFW gikan sa Enero 1984 hangtod Marso 2025.